२६ सीटीआर ३०
लोकमत न्यूज नेटवर्क
जळगाव : जळगाव शहरासह जिल्ह्यामध्ये गेल्या दोन ते तीन महिन्यांपासून दुचाकी चोरीच्या घटना वाढल्या आहेत. चोरट्यांना पकडणे व मुद्देमालाचा तपास लावण्यासाठी पोलिसांनी आता कंबर कसली आहे. शुक्रवारी एलसीबीच्या पथकाने दोन चोरट्यांना पकडून चोरी केलेली एक दुचाकी त्यांच्याकडून जप्त केली आहे.
धरणगावातील रहिवासी योगराज भगवान चौधरी यांची दुचाकी २६ मार्च रोजी एरंडोल रस्त्यावरील हॉटेल मयुरच्या बाहेरून अज्ञात चोरट्यांनी चोरून नेली होती. त्यानंतर याप्रकरणी धरणगाव पोलिसात गुन्हा दाखल करण्यात आला होता. दरम्यान, ही दुचाकी संजय उर्फ काळू बळीराम कोळी (२३, रा़ वढोदा, ता. यावल) व गोवरलाल उर्फ गोलू कृष्णनाथ कोळी (२१, रा. शिरागड, ता. यावल) हे दोन तरूण घेऊन फिरत असल्याची माहिती एलसीबीचे पोलीस निरीक्षक किरणकुमार बकाले यांना मिळाली. त्यांनी लागलीच संशयितांचा शोध घेऊन अटक करण्याच्या सूचना केल्या. त्यानुसार दोघांना शुक्रवारी एलसीबीच्या पथकाने विदगाव फाट्याजवळ सापळा रचून अटक केली. त्यांच्याजवळून चोरीला गेलेली दुचाकी हस्तगत करण्यात आली असून, दोघांना पुढील कार्यवाहीसाठी धरणगाव पोलिसांच्या ताब्यात देण्यात आले आहे.
...यांनी केली कारवाई
ही कारवाई पोलीस निरीक्षक किरणकुमार बकाले यांच्या मागदर्शनाखाली विजयसिंग पाटील, सुधाकर अंभोरे, नितीन बाविस्कर, प्रितम पाटील, राहुल पाटील आदींनी केली आहे.