लोकमत न्यूज नेटवर्क
जळगाव : महात्मा फुले मागासवर्गीय विकास महामंडळाच्या योजनेचा लाभ घ्यायचा असेल तर त्याला मागासवर्गीय लाभार्थी आवश्यक आहे. १० हजार रुपये अनुदान व ९० हजार रुपये बँक कर्ज असा एक लाख रुपयांचा लाभ लाभार्थ्याला दिला जातो. येथे या लाभार्थ्यांच्या नावाने इतर समाजातील लोकांनाच लाभ झाल्याचे उघड झालेले आहे. कोट्यवधी रुपयांचा अपहार या योजनेत संगनमताने करण्यात आला आहे.
दरम्यान, अटकेतील संदीप प्रभाकर सावळे (वय ३६,रा.भुसावळ) हाच मुख्य एजंट असून त्याने इतरांच्या नावाने बँकेत पैसे वळविले आहेत. संजीव वसंत सोनवणे या सेतू कक्षाचे काम करणाऱ्या तरुणाच्या करंट खात्यावर १ कोटी ३ लाख रुपये जमा केले. त्याच्याकडून एटीएम कार्ड व धनादेश घेऊन ही रक्कम काढण्यात आलेली आहे. सावळे याने या गुन्ह्यात मदत केली नाही तर ॲट्रासिटीच्या गुन्ह्यात अडकविण्याची धमकी सोनवणे याला दिली होती, अशी माहिती आर्थिक गुन्हे शाखेचे पोलीस निरीक्षक बळीराम हिरे यांनी दिली.
या गुन्ह्यात याआधी महामंडळाचा व्यवस्थापक खंडू विठोबा लोहकरे (वय ४६,रा.नाशिक), अकांऊटंट सागर वसंत अडकमोल (वय ३९,रा.रविराज कॉलनी), बँकेचा उपव्यवस्थापक सुनंदा बाबुराव तायडे (वय ५९,रा.वानखेडे हौसिंग सोसायटी), शिपाई प्रकाश लक्ष्मीकांत कुळकर्णी (रा.राधाकृष्ण नगर), अमरीश अनिल मोकाशी (रा.सदगुरू नगर) व संजीव वसंत सोनवणे (रा.भुसावळ) यांना अटक झालेली आहे तर मुकेश देवराम बारमासे (रा.नागपूर) यांना अटकपूर्व जामीन मंजूर झालेला आहे. यातील मोकाशी याच्या बँक खात्यातही ५९ लाख रुपये वर्ग झाले आहे. दरम्यान, या गुन्ह्यात पुरावा नष्ट केल्याचे वाढीव कलम लावण्यात आलेले आहे.
झोपडीत राहणाऱ्यांच्या खात्यात कोटीची रक्कम
भुसावळमधील एका बनावट व्यक्तीच्या बँक खात्यात १ कोटी रुपयांची रक्कम झाली आहे. या व्यक्तीच्या खात्यात कधी दहा हजार रुपये नव्हते. त्याशिवाय अनेकांच्या खात्यावर १ ते १० लाखापर्यंत रक्कम जमा झाली आहे. या लोकांना पाच ते हजार रुपये देऊन ही रक्कम दलालांनी काढून घेत साखळीतील सर्वांनी वाटून घेतल्याचे तपासात उघड झालेले आहे.
काय आहे प्रकरण
महात्मा फुले मागासवर्गीय विकास महामंडळ, बँकेचे अधिकारी व दलाल यांनी संगनमत करून शासनाच्या बीज भांडवल योजनेत जे लाभार्थी अस्तित्वातच नाहीत अशांच्या नावे बोगस कर्ज प्रकरण तयार करुन एकाचा फोटो, दुसऱ्याचे आधारकार्ड, तिसऱ्याचा पत्ता अशा प्रकारे बनावट दस्ताऐवज तयार करून ते खरे आहे, असे दाखविले. ७०२ बोगस लाभार्थी दाखवून साडेसहा कोटी रुपये शासनाचे लुटले आहेत. एकूण २३ लोकांच्या बँक खात्यात ही रक्कम जमा झाली आहे. २०१६ ते २०१८ या कालावधीत हा प्रकार घडलेला आहे. याप्रकरणी महात्मा फुले मागासर्वीय विकास महामंडळाच्या जिल्हा व्यवस्थापक वैशाली अनिश जाधव यांच्या फिर्यादीवरून २ ऑगस्ट २०१९ रोजी रामानंद नगर पोलीस ठाण्यात याप्रकरणी गुन्हा दाखल झाला होता.या गैरप्रकारामुळे मूळ लाभार्थ्यांना लाभ मिळालाच नाही.
कोट...
या गुन्ह्याची व्याप्ती खूप मोठी आहे. आरोपींची संख्यादेखील तितकीच मोठी आहे. ज्या-ज्या लोकांच्या खात्यात रक्कम झाली त्या सर्वांना यात आरोपी केले जाणार आहे. थोड्या पैशांच्या आमिषाला बळी पडून गुन्हा करणाऱ्यांना या लोकांनी मदत केली आहे. बँकेतील अधिकारी, कर्मचारी व महामंडळाचे कर्ज प्रकरण तयार करणारे, मंजूर करणारे व लाभ घेणारे या सर्वांविरुध्द कारवाई केली जाणार आहे.
-बळीराम हिरे, पोलीस निरीक्षक, आर्थिक गुन्हे शाखा