जळगाव : तालुक्यातील ग्रामपंचायत निवडणुकीच्या मतमोजणी दरम्यान तीन यंत्रे बंद पडल्याच्या घटना घडल्या. यामुळे उमेदवार व त्यांच्या समर्थकांनी फेर मतमोजणी करण्याची मागणी केली. मात्र ती मागणी नाकारण्यात आल्याने उमेदवारांनी प्रशासनाच्या कारभारावर आक्षेप घेतला. विशेष म्हणजे मतमोजणीला सुरुवात झाल्यानंतर शिरसोली प्र.बो. ग्रामपंचायतीची मतमोजणी अर्ध्या तासात पूर्ण झाली खरी मात्र निकाल दुपारी तीन वाजता जाहीर करण्यात आला.
तालुक्यातील ४० ग्रामपंचायतींची मतमोजणीला सोमवार, १८ जानेवारी रोजी सकाळी १० वाजेपासून नूतन मराठा महाविद्यालयात सुरूवात झाली. या वेळी त्या-त्या ग्रामपंचायतींच्या मतमोजणीवेळी उमेदवार व त्यांच्या प्रतिनिधींना उपस्थित राहण्याच्या सूचना देण्यात आल्या.
फेरमोजणीसाठी लगेच मागणी का केली नाही ?
शिरसोली प्र.बो. येथील प्रभाग क्रमांक सहा मधील सर्वसाधारण महिला प्रवर्गासाठी राखीव असलेल्या जागेवर तसेच याच प्रभागात नामप्र महिला प्रवर्गासाठी राखीव असलेल्या जागेवर विजयी उमेदवारांमध्ये कमी मतांचे अंतर असल्याने तसेच धानवड येथील प्रभाग क्रमांक तीन मधील उमेदवारांनी आक्षेप घेत फेरमतमोजणीची मागणी केली. मात्र ती फेटाळण्यात आली व मतदान यंत्र सुरू होते त्याच वेळी मागणी का केली नाही, असे म्हणत निवडणूक निर्णय अधिकाऱ्यांनी उमेदवारांची मागणी नाकारली. त्या वेळी उमेदवारांना पोलिसांच्या मदतीने बाहेर जाण्यास सांगण्यात आले. यामुळे उमेदवारांसह समर्थक नाराज झाले होते.
तीन यंत्रे बंद पडलीमतमोजणी सुरू असताना तीन यंत्रे बंद पडल्याच्या घटना घडल्या. यामुळे उमेदवार व त्यांच्या समर्थकांनी फेर मतमोजणी करण्यास सांगितले. तेथेच काही उमेदवारांनी आताच मोजणी करण्याचा आग्रह धरला. मात्र तो नाकारण्यात आला.
पाॅईन्टर
माध्यम प्रतिनिधी, छायाचित्रणास केली बंदी
मीडिया कक्ष नावाला
मास्क नसताना अनेक जण पोहचले मतमोजणी कक्षापर्यंत
मोबाईल आढळल्याने काढले बाहेर
मतमोजणी कक्षात मोबाईल नेण्यास बंदी होती. सर्वांना तपासणी करूनच मतमोजणी कक्षात सोडण्यात येत होते. तरीदेखील एक प्रतिनिधी मोबाईल घेऊन मतमोजणी कक्षात पोहचला होता. मात्र मध्ये त्याच्याकडे मोबाईल असल्याचे आढळून आल्यानंतर त्याला बाहेर काढण्यात आले. नंतर त्याने मोबाईल इतरांकडे देऊन पुन्हा मतमोजणी कक्षात पोहचला.
ओळखपत्राविना कर्मचारी दाखल
मतमोजणी कक्षात ओळखपत्र पाहून प्रवेश दिला जात होता. मात्र तहसील कार्यालयाची एक महिला कर्मचारी ओळकपत्राविना आल्याने तिला पोलिसांनी मतमोजणी कक्षात प्रवेश नाकारला. अखेर तहसीलदारांशी बोलणे करुन देऊन विना ओळखपत्र या महिलेला आत सोडण्यात आले. अशाच प्रकारे मतमोजणीसाठी जाणाऱ्या प्रतिनिधीच्या पासवर छायाचित्र नसताना त्यालाही प्रवेश देण्यात आला.