कजगाव, ता. भडगाव : कजगाव परिसरात चोरीचे सत्र थांबण्यास तयारच नाही. दि. ७ च्या मध्यरात्रीनंतर येथील पाच पावली माता नगरमधील रहिवासी रवींद्र पांडुरंग कोळी यांची दुचाकी अज्ञात चोरट्यांनी लांबवली. गेल्या महिन्याभरापासून सुरू झालेले चोरीचे सत्र थांबण्यास तयारच नसल्याने घबराट पसरली आहे.
गेल्या महिन्यात एकाच रात्रीत चक्क तीन घर फोडत अज्ञात चोरट्यांनी कजगावात चोरीचे सत्र सुरू केले. अमावास्येच्या रात्री बहोनी करत चोऱ्या सुरू झाल्या आहेत. या तीन घरफोड्यांचा तपास लागत नाही, तोच चोवीस तासांनंतर रस्तालूट, काही दिवसांनी दिवसाढवळ्या दुचाकी चोरी अशा घटना घडल्या आहेत.
चोवीस तासांत चक्क दोन दुचाकी लांबविल्या. या साऱ्या चोऱ्याचा तपास सुरू आहे. मात्र पोलिसांना अद्याप यश आलेले नाही. दरम्यान, कजगावपासून एक किलोमीटर अंतरावर असलेल्या भोरटेक येथून मुख्य रस्त्यालगत असलेल्या कम्पाउंडच्या शेडमधून चार गायी अज्ञात चोरट्यांनी लाबविल्या होत्या. या साऱ्या चोऱ्यांची चर्चा सुरू असतानाच पुन्हा दि. ७ च्या मध्यरात्रीनंतर कजगाव भडगाव या मुख्य रस्त्याला लागून असलेल्या पाच पावली माता नगरमधील रहिवासी रवींद्र पांडुरंग कोळी यांची घराजवळ लावलेली दुचाकी (एमएच१९/बीएल८७०१) ही अज्ञात चोरट्यांनी लांबवली.