नातेवाईकांनी दिलेल्या माहितीनुसार, करिना हिचा पती दूध फेडरेशनमध्ये कामाला आहे तर सासऱ्यांची मालवाहू गाडी आहे. सकाळी उठल्यानंतर करिना हिने पती व सासऱ्यांचा जेवणाचा डबा तयार करुन दिला. ते कामाला गेले होते तर सासू बाहेर गेली होती. घरात फक्त दीर नागेश हाच होता. नागेश झोपेतून उठल्यावर चहासाठी आईला शोधत असतानाच एका खोलीत पत्र्याचा आवाज आला, आवाजाच्या दिशेने जाऊन बघितले असता, करिनाने गळफास घेतल्याचे दिसून आले. नागेशसह इतरांनी करिना हिस तत्काळ खासगी रुग्णालयात हलविले असता वैद्यकीय अधिकाऱ्यांनी तिला मृत घोषित केले. मयत करिना हिच्या पश्चात पती सागर, दीर नागेश, सासरे राजू वासुदेव निकम व सासू निर्मलाबाई तसेच आजी गंगाबाई,आई सुलोचना भालेराव रा. खिरोदा ता. रावेर असा परिवार आहे.
रुग्णालयात उडाला गोंधळ
दरम्यान, करिना हिने आत्महत्या केली नसून तिच्यासोबत तिचे पतीसह सासरच्यांनी घातपात केल्याचा आरोप तिच्या आईने केला आहे. या घटनेनंतर जिल्हा रुग्णालयात माहेर तसेच सासरचे नातेवाईक एकमेकांसमोर आल्याने गोंधळ उडाला होता. परिस्थिती नियंत्रणात आणण्यासाठी जिल्हापेठ पोलिसांना पाचारण करण्यात आले होते.
आई म्हणते मुलीने लग्न केल्याचे माहितीच नव्हते
करिना यावल तालुक्यातील न्हावी येथे आजी गंगाबाई भालेराव यांच्याकडे शिकायला होती. आजीच्या सहमतीने करिना हिचा ११ जुलै २०२१ रोजी जळगाव शहरातील सागर राजू निकम या तरुणाशी विवाह पार पडला होता. करिनाची २००५ ची जन्मतारीख असून ती १५ वर्षांची आहे, तिचा लग्नाला नकार होता. या लग्नाबद्दल थेट लग्नाच्या दिवशीची माहिती मिळाली होती. तिला मारझोड तसेच दमदाटी करुन सासरे राजू निकम तसेच त्यांच्या इतर नातेवाईकांनी जबरदस्तीने करिनाचा विवाह केला. करिना मरायला खूप घाबरत होती, त्यामुळे ती आत्महत्या करु शकत नाही, तिला सासरच्यांनीच मारले असल्याचा आरोप करिनाची आई सुलोचना हिने जिल्हा रुग्णालयात पत्रकारांशी बोलताना केला.
सासरचे म्हणतात, करिनाला आई-वडील नसल्याची माहिती मिळाली
करिनाच्या आईने केलेल्या आरोपाबाबत करिनाचे सासरे राजू सुकदेव निकम यांना विचारले असता ते म्हणाले की, करिना हिला आई किंवा वडील आहेत याबाबत आम्हाला कुठलीच माहिती नव्हती. आई, वडील नसलेली मुलगी आजीकडे राहते. शेतात जाऊन काम करते, तिचे भविष्य उज्ज्वल व्हावे, या उद्देशातून करिना तसेच तिच्या आजीच्या संमतीने आम्ही स्वखर्चाने लग्न केले. ती अल्पवयीन नव्हती, तिचे वय १९ वर्षे होते. करिना हिने आत्महत्या केली, याचा आम्हालाही धक्का बसल्याचे राजू निकम म्हणाले.