लोकमत न्यूज नेटवर्क
जळगाव : महापालिका प्रशासनाकडून शहरातील मुदत संपलेल्या मार्केटमधील गाळेधारकांवर कारवाईचा इशारा दिल्यानंतर, २६ मार्चपासून शहरातील १६ अव्यावसायिक मार्केटमधील गाळेधारकांनी मनपा कामबंद आंदोलन सुरू केले होते. मात्र, जिल्हा प्रशासनाकडून लॉकडाऊनमध्ये शिथिलता आणल्यानंतर गाळेधारकांनी आंदोलनाला स्थगिती देत पुन्हा आपली दुकाने उघडण्यास सुरुवात केली आहे. हे आंदोलन तात्पुरते स्थगित करण्यात आले असल्याची माहिती गाळेधारक संघटनेचे अध्यक्ष डॉ. शांताराम सोनवणे यांनी दिली आहे.
महापालिका प्रशासनाकडून महासभेत मुदत संपलेल्या मार्केटमधील गाळेधारकांकडून थकीत भाडे वसूल करून, सर्व गाळे ताब्यात घेऊन याबाबतचा प्रस्ताव महासभेत मंजूर करण्यात येणार होता. या पार्श्वभूमीवर शहरातील १६ व्यावसायिक मार्केटमधील सुमारे २५०० गाळेधारकांनी काम बंद आंदोलन पुकारले होते. त्यात आता हा ठराव मंजूर झाला असल्यामुळे व दुसरीकडे दोन महिन्यांपासून गाळेधारकांना वर निर्माण झालेल्या आर्थिक संकटामुळे गाळेधारकांनी कामबंद आंदोलन मागे घेण्याचा निर्णय घेतला आहे. महापालिकेने ठराव मंजूर केला असला तरी, १६ अव्यवसायिक मार्केटमधील गाळेधारकांबाबत मनपा प्रशासन व पदाधिकारी सकारात्मक निर्णय घेतील अशी अपेक्षा गाळेधारक संघटनेच्या पदाधिकाऱ्यांनी व्यक्त केली आहे. मनपा प्रशासनाकडे संबंधित ठरावाची प्रत मागितली असून, ही प्रत मिळाल्यानंतर गाळेधारक आपली भूमिका स्पष्ट करतील, अशीही माहिती गाळेधारक संघटनेच्या पदाधिकाऱ्यांनी दिली आहे.
दोन महिन्यांपासून व्यवसाय ठप्प असल्याने घेतला निर्णय?
जिल्हा प्रशासनाने मंगळवारपासून दुकाने उघडण्यास परवानगी दिल्यामुळे, मुदत संपलेल्या अव्यावसायिक मार्केटमधील गाळेधारकांनी आंदोलन मागे घेण्याचा निर्णय घेतला आहे. मात्र, भविष्यात मनपा प्रशासनाकडून गाळेधारकांवर कारवाई करण्यात आली तर सर्व गाळेधारक आपल्या कुटुंबीयांसोबत आंदोलनात उतरतील, असा इशारादेखील गाळेधारक संघटनेच्या वतीने देण्यात आला आहे.
कोट..
दोन महिन्यांपासून व्यवसाय बंद असल्याने, गाळेधारक आर्थिक संकटात सापडले आहेत. त्यामुळे तूर्तास आंदोलन स्थगित करण्याचा निर्णय घेतला असला, तरी भविष्यात मनपाकडून कोणतीही कार्यवाही झाल्यास त्याविरोधात तीव्र आंदोलन करण्याची तयारी आमची आहे. पालकमंत्री गुलाबराव पाटील व नगरविकास मंत्री एकनाथ शिंदे यांची भेट घेतल्यानंतर आज आमची पुढील भूमिका जाहीर करण्यात येईल.
- डॉ. शांताराम सोनवणे, अध्यक्ष, गाळेधारक संघटना