भुसावळ : गौण खनिजाची अवैध वाहतूक करणाऱ्या चालकास ट्रक तहसील कार्यालयात जमा करण्याची सूचना करूनही त्याची अंमलबजावणी न करता, उलट प्रांत व तलाठ्याच्या अंगावर धावून दमदाटी केल्याची घटना घडली. याप्रकरणी तलाठी विनोद बारी यांच्या फिर्यादीवरून दोघांवर गुन्हा दाखल झाला.
प्रांताधिकारी रामसिंग सुलाने, तलाठी विनोद बारी तसेच दीपक कापसे, चालक ताराचंद बाविस्कर, तहसीलदार यांच्या वाहनावरील चालक विलास नारखेडे हे १७ जुलैला रात्री ८ वाजता सरकारी वाहनाने साकेगाव शिवारात गस्त करत होते. रात्री ९ वाजेच्या सुमारास भुसावळ ते जळगाव महामार्गावर वाघूर नदीच्या पुलाच्या अलीकडे जळगावकडून येणाऱ्या डम्परला त्यांनी थांबवले. त्यात अवैध गौण खनिज असूनही चालकाकडे परवाना नव्हता. त्यामुळे पथकाने चालक दिगंबर कोळी (रा. साकेगाव) याला ट्रक तहसील कार्यालयात उभा करण्यास सांगितले. तरीही त्याने डम्पर थेट साकेगावमध्ये नेला. प्रांत आणि पथकाने त्याचा पाठलाग करून साकेगाव गाठले. तेथे आलेले डम्परमालक अविनाश चुडामण सोनवणे याने डम्पर माझे आहे. तुमच्याकडून जे होईल ते करा, अशी धमकी देत अंगावर धावून गेला व दमदाटी केली. याप्रकरणी दिगंबर कोळी, अविनाश सोनवणे यांच्यावर गुन्हा दाखल झाला.