जळगाव : बीएचआर घोटाळ्यात अटकेत असलेले संशयित सूरज झवर यांच्या फ्लॅटमध्ये आमदार सुरेश भोळे यांचे कोरे लेटर पॅड सापडल्याच्या तक्रारीवरून चांगलाच राजकीय गदारोळ सुरू आहे. या प्रकरणी तक्रार का केली जात नाही, असा प्रश्न उपस्थित होत असताना हे लेटर पॅड बनावट असल्याचा दावा भाजपच्या वतीने करण्यात आला आहे.
बीएचआर घोटाळ्यात अटकेत असलेले संशयित सूरज झवर यांच्या पुणे येथील फ्लॅटमध्ये आमदार भोळे यांचे लेटर पॅड सापडल्याने जोरदार चर्चा सुरू झाली. सूरज झवर याला २२ जानेवारी रोजी जळगावातून अटक केल्यानंतर तो पुण्यात कोठडीत आहे. यादरम्यान पोलीस माहिती एकत्रित करीत असताना झवर याच्या फ्लॅटमध्ये महत्त्वाच्या कागदपत्रांसह आमदार भोळे यांचे कोरे लेटर पॅड सापडले. यापूर्वी माजी मंत्री गिरीश महाजन यांचेही लेटर पॅड व सरकारी शिक्के झवर यांच्याकडे सापडले होते. त्यामुळे राजकीय वातावरण ढवळून निघाले होते. आता पुन्हा आमदार भोळे यांचे लेटर पॅड सापडल्याने राजकीय गदारोळ सुरू झाला आहे.
लेटर पॅड कोणालाही देत नाही
या प्रकारानंतर भाजपचे विधानसभा क्षेत्रप्रमुख दीपक साखरे यांनी म्हटले आहे की, बीएचआर प्रकरणाशी आमदार सुरेश भोळे यांचा काहीही संबंध नाही. झवर यांच्या कार्यालयात सापडलेले आमदार भोळे यांचे लेटर पॅड बनावट आहे. असे कोणत्याही प्रकारचे कोरे लेटर पॅड आमदार कार्यालयाकडून अथवा भाजप कार्यालयाकडून कोणत्याही व्यक्तीस अथवा संस्थेस दिले जात नाही. आमदार कार्यालयाकडून लेटर पॅडवर मजकूर छापून त्याची आमदार कार्यालयातील रजिस्टरमध्ये नोंद केल्याशिवाय कोणालाही दिले जात नाही, असे साखरे यांनी स्पष्ट केले. या प्रकरणात यापूर्वीसुद्धा सरकारी शिक्के आढळून आलेले आहेत. सरकारी शिक्के बनावट बनवू शकतात, तेथे आमदारांचे बनावट लेटर पॅड बनवणे सहज शक्य आहे, असेही साखरे यांचे म्हणणे आहे.
——————-
सूरज झवर यांच्याकडे सापडलेले आपल्या नावाचे लेटर पॅड बनावट आहे. आपण ते कोणाला दिलेले नाही. ते बनावटच असल्याने व आपले नसल्याने याविषयी तक्रार देण्याचा प्रश्न येत नाही.
- आमदार सुरेश भोळे