जळगाव : इस्त्री केलेल्या कपड्याचे पैसे मागितल्याचा राग आल्याने पोलीस अंमलदार नटवर जाधव यांनी विवाहितेसह तिचा पती व भाचा अश्यांना शिवीगाळ व मारहाण करून बंदुकीच्या गोळीने जीवे ठार मारण्याची धमकी दिल्याची घटना रविवारी रात्री ८ वाजता घडली. याप्रकरणी सोमवारी एमआयडीसी पोलीस ठाण्यात अदखलपात्र गुन्हा दाखल करण्यात आला आहे.
पोलीस मुख्यालयात कार्यरत असलेल्या नटवर जाधव (रा.सदगुरू नगर) यांनी कौतीक नगरातील राधा विजय वाघ यांच्याकडे इस्रीसाठी कपडे टाकले होते. १६ मे रोजी रात्री घेण्यासाठी नटवर आले असता राधा वाघ यांनी कपड्यांना इस्त्री केलेली नव्हती. यापुर्वी केलेल्या कपड्यांचे २५ रुपये द्या असे सांगितल्याचा राग आल्याने नटवर जाधव याला यांनी राधा वाघ, तिचे पती विजय वाघ आणि भाचा विकी बेडीसकर यांना शिवीगाळ करून बंदुकीच्या गोळीने मारण्याची धमकी दिली. राधा वाघ यांच्या फिर्यादीवरून पोलीस नाईक नटवर जाधव याच्यावर एमआयडीसी पोलीसात अदखलपात्र गुन्हा दाखल केला आहे. तपास सहाय्यक पोलीस निरीक्षक अमोल मोरे करीत आहे.