जळगाव : बँकेच्या अधिकाऱ्यांना हाताशी धरून बनावट कागदपत्राद्वारे बीज भांडवल योजनेचे बोगस कर्ज प्रकरण करून महात्मा फुले मागासवर्गीय विकास महामंडळाच्या योजनेत साडेसहा कोटी रुपयांच्या अपहार प्रकरणात संदीप प्रभाकर सावळे (वय ३६, रा. भुसावळ) याला आर्थिक गुन्हे शाखेने गुरुवारी अटक केली. या साडेसहा कोटी रुपयांपैकी तब्बल १ कोटी ३ लाख रुपये साबळे याच्या बँक खात्यात जमा झालेले आहेत.
शासकीय योजनेचा अपहार झाल्याचा प्रकार उघड झाल्यानंतर महात्मा फुले मागासर्गीय विकास महामंडळाच्या जिल्हा व्यवस्थापक वैशाली अनिश जाधव यांच्या फिर्यादीवरून २ ऑगस्ट २०१९ रोजी रामानंद नगर पोलीस ठाण्यात याप्रकरणी गुन्हा दाखल झाला होता. या गुन्ह्यात याआधी महामंडळाचा व्यवस्थापक खंडू विठोबा लोहकरे (वय ४६, रा. नाशिक), अकाैंटंट सागर वसंत अडकमोल (वय ३९, रा. रविराज कॉलनी), सुनंदा बाबूराव तायडे (वय ५९, रा. वानखेडे हौसिंग सोसायटी), प्रकाश लक्ष्मीकांत कुळकर्णी (रा. राधाकृष्ण नगर), अमरीश अनिल मोकाशी (रा. सदगुरू नगर) व संजीव वसंत सोनवणे (रा. भुसावळ) यांना अटक झालेली आहे. तसेच मुकेश देवराम बारमासे (रा. नागपूर) यांना अटकपूर्व जामीन मंजूर झालेला आहे. महामंडळाने केलेल्या चौकशीत ७०२ बोगस लाभार्थी दाखवून महामंडळाचे अधिकारी, बँक अधिकारी, कर्मचारी व ४० ते ५० एजंट अशांनी बोगस कागदपत्राद्वारे बोगस लाभार्थी दाखवून साडेसहा कोटी रुपयांचा अपहार केल्याचे उघड झाल्याची माहिती आर्थिक गुन्हे शाखेचे पोलीस निरीक्षक बळीराम हिरे यांनी ‘लोकमत’ ला दिली.
दरम्यान, अटकेतील साबळे याला न्यायालयात हजर केले असता २७ जूनपर्यंत पोलीस कोठडी सुनावण्यात आली आहे.