नशिराबाद : ग्रामपंचायतीने मोठा गाजावाजा करीत शहरातील मुख्य चौकात व रस्त्यांवर बसवलेली सुमारे ५६ सीसीटीव्ही कॅमेरे गेल्या काही महिन्यांपासून बंद अवस्थेत आहे. संपूर्ण शहराकडे लक्ष ठेवणाऱ्या या ‘डोळ्यांना मोतीबिंदू’ झाला असून याचे ‘ऑपरेशन’ दुरुस्ती होणार केव्हा? असा उपहासात्मक प्रश्न केला जात आहे.
गावाच्या कायदा सुव्यवस्थेवर लक्ष ठेवण्यासाठी गावात विविध चौका-चौकात ग्रामपंचायतीतर्फे लाखो रुपये खर्च करून सीसीटीव्ही कॅमेरे बसविले. संपूर्ण गाव सीसीटीव्हीच्या निगराणीत होते. गावात कुठे काही घटना घडामोडी घडली तर सीसीटीव्ही कॅमेराच्या माध्यमातून घटनेतील संशयितांचा शोध घेणे पोलिसांना सोयीचे ठरत होते. मात्र आता गावातील कॅमेरे बंद आहे. वादळ, वारा यामुळे काही ठिकाणी सीसीटीव्ही कॅमेऱ्याच्या वायरी पण तुटल्या आहेत. लाखो रुपये खर्च करून गावाच्या सुरक्षेसाठी तयार केलेल्या कार्यप्रणालीची देखभाल ग्रामपंचायतीने करायला पाहिजे. मात्र त्यासाठी अनास्था असल्याचे चित्र आहे. ग्रामपंचायत व स्थानिक लोकप्रतिनिधींनी याबाबत दखल घ्यावी अशी अपेक्षा व्यक्त होत आहे.
बस स्टॅन्ड, शिवाजी चौक, ग्रामपंचायत, होळी मैदान, मेनरोड, साती बाजार यासह विविध चौकात सीसीटीव्ही कॅमेरे कार्यान्वित केले होते. या कॅमेऱ्याचे संपूर्ण डीव्हीआर पोलीस ठाण्यात ठेवण्यात आले मात्र गेल्या काही महिन्यांपासून सीसीटीव्ही कॅमेरा दुरुस्ती अभावी बंद पडलेले आहे. ग्रामपंचायतीने याबाबत त्वरित दखल घ्यावी व उपाययोजना करावी अशी मागणी होत आहे.