संतापजनक घटना : तिघांविरोधात गुन्हा
भुसावळ : शहरात आईच्या नात्यात असलेल्या जवळच्या नातेवाईक महिलेकडे शिक्षणासाठी आलेल्या अल्पवयीन मुलीचा नातेवाईक महिलेच्या पतीने विनयभंग केला. ही बाब या महिलेला सांगितली असता तिने दुर्लक्ष केले. यामुळे ही पीडिता अन्य जवळच्या नातेवाइकाकडे आली; मात्र तेथे त्यानेच तिच्यावर अत्याचार केल्याची संतापजनक घटना घडली. या प्रकरणी या तिघांविरोधात बाजारपेठ पोलिसात गुन्हा दाखल करण्यात आला आहे.
मध्य प्रदेशातील एका गावातील १६ वर्षीय ही मुलगी शिक्षणासाठी आपल्या जवळच्या नातेवाईक महिलेकडे आली असता तिच्यावर या महिलेचा पती संतोष लागीर गिरी (५३) याने विनयभंग केला. ही बाब मावशीला सांगितल्यानंतर त्यांनी दुर्लक्ष करीत बालिकेला अन्य जवळचे नातेवाईक संतोष वामनराव भारती (३४) याच्याकडे पाठविले. मात्र संतोष भारती याने या मुलीवर तब्बल सात महिने अत्याचार केले. पीडितेने ही बाब कुणाला सांगितल्यास जीवे ठार मारण्याची धमकी देण्यात आली. शेवटी अत्याचाराला कंटाळून गुरुवारी पीडितेने बाजारपेठ पोलीस ठाणे गाठून कैफियत मांडल्यानंतर संतोष लागीर गिरी (५३), संतोष वामनराव भारती (३४) व प्रमिला संतोष गिरी यांच्याविरोधात गुन्हा दाखल करण्यात आला. संतोष गिरी व संतोष भारती यांना अटक करण्यात आली. तपास निरीक्षक दिलीप भागवत यांच्या मार्गदर्शनाखाली सहा.निरीक्षक गणेश धुमाळ, सुभाष साबळे करीत आहेत. हे नातेवाईक अगदी जवळचे असूनही मुलगी ही या आरोपींच्या मुलीसारखीच आहे, तर माणुसकीला काळिमा फासणाऱ्या या घटनेमुळे शहरातून अत्यंत संतापजनक प्रतिक्रिया समोर येत आहेत.
दरम्यान याप्रकरणी घटनेतील आरोपींना शुक्रवारी न्यायालयात हजर केले असता दोन दिवसाची पोलीस कोठडी सुनावण्यात आलेली आहे.