भुसावळ / मुक्ताईनगर, जि.जळगाव : भुसावळ व मुक्ताईनगरात शुकवारची पहाट खुनाच्या घटनांनी उजाडली. भुसावळात दगडाने ठेचून एका अज्ञात तरुणाचा खून करण्यात आला तर मुक्ताईनगरात मेहुण्यानेच शालकाचा कुऱ्हाडीने घाव घालून खून केला.
मुक्ताईनगर येथे सासरी मुक्कामी आलेल्या मेहुण्याने २१ वर्षीय शालकाच्या डोक्यात कुऱ्हाड घालून निर्घृण खून केला. ही घटना शुक्रवारी सकाळी साडेसहा वाजता शहरातील पशुवैद्यकीय चिकित्सालय शेजारील इमारतीत उघडकीस आली.
तीन महिन्यांपूर्वी लग्न झालेल्या विशाल वामन ठोसरे या तरुणासाठी गुरुवारची रात्र काळरात्र ठरली. गेल्या तीन दिवसांपासून सासरी मुक्कामी आलेला त्याचा मेहुणा विजय चैत्राम सावकारे (रा. चुंचाळे, ता. यावल) याने शालक विशाल झोपेत असताना डोक्यात कुऱ्हाड घालून निर्घृणपणे खून केल्याचा संशय आहे. घटनेनंतर संशयित मेहुणा फरार झाला.
गुरुवारी जावयासाठी पाहुणचार केल्यानंतर विशाल ठोसरे आणि मेहुणा विजय सावकारे हे घराच्या वरच्या मजल्यावर झोपायला गेले. रात्री दोघे एकाच खोलीत झोपले. मात्र सकाळी विशालचा मृतदेह आढळून आला तर मेहुणा येथून पसार झाल्याचे दिसून आले.
दरम्यान, माहिती मिळताच पोलीस निरीक्षक राहुल खताळ यांनी आपल्या पथकासह घटनास्थळी पोहचत पंचनामा केला. आरोपीच्या शोधासाठी जळगावहून श्वानपथकास पाचारण करण्यात आले होते. विशाल याचे वडील सेवानिवृत्त मुख्यध्यापक आहेत.
भुसावळात अज्ञात तरुणाचा
दगडाने ठेचून खून
भुसावळात जामनेर रोडवरील गजानन महाराज मंदिराजवळ एका तरुणाचा दगडाने ठेचून खून करण्यात आला. ही घटना शुक्रवारी सकाळी उघडकीस आली. घटनास्थळी पोलीस अधिकारी दाखल झाले. त्यांनी पंचनामा केला. चेहऱ्याचा चेंदामेंदा झाल्याने या तरुणाची ओळख पटू शकली नाही.