जळगाव : ‘दिऊ’ला तुमच्याकडे ठेव...प्लीज कुणाचं जवळ नको देऊ...असा संदेश भावाला पाठवून विवाहित बहिणीने राहत्या घरातील पंख्याला साडीच्या सहाय्याने गळफास घेऊन आत्महत्या केली. ही दुर्दैवी घटना दुपारी दीड ते दोन वाजेच्या सुमारास बांभोरी येथे घडली. कविता राकेश सोनवणे (२२, रा. दत्तनगर वाल्मीक नगर, बांभोरी, ता. धरणगाव) असे मयत विवाहितेचे नाव आहे. याप्रकरणी पोलिसात अकस्मात मृत्यूची नोंद करण्यात आली आहे. आत्महत्येचे कारण समजून आलेले नाही.
नातेवाइकांनी दिलेल्या माहितीनुसार पिंप्राळ्यातील कविता यांचे दोन वर्षांपूर्वी बांभोरी येथील राकेश सोनवणे यांच्याशी प्रेमविवाह झाला होता. त्यांना एक वर्षाची दुर्वा ही मुलगी आहे. दरम्यान, रविवारी घरात कुणीही नसताना दीड ते दोन वाजेच्या सुमारास कविता यांनी पंख्याला गळफास घेऊन आत्महत्या केली. काही वेळानंतर कुटुंबीय घरी आल्यानंतर ही घटना उघडकीस आली. नंतर मृतदेह जिल्हा रुग्णालयात हलविण्यात आला. तर सासरच्यांनी कविता यांच्या माहेरच्यांना घटनेची माहिती दिल्यानंतर तिचे वडील गंगाधर महाजन व मुलगा सुशील यांनी नातेवाइकांसह जिल्हा रुग्णालयात धाव घेतली होती. त्यामुळे रुग्णालयात एकच गर्दी झाली होती.
आईकडे मुलगी ठेवून रविवारी सासरी परतली
मयत कविता ही शनिवारी माहेरी आली होती. ती एक ते दोन दिवस थांबणार असल्याचे त्यांनी आई-वडिलांना सांगितले. मात्र, रविवारी मुलगी दुर्वा हिला आईकडे ठेवून ती सकाळी सासरी आली. त्यानंतर दुपारी आत्महत्येची माहिती मिळाली. दरम्यान, आत्महत्येचे कारण अद्याप समजून आलेले नाही.
भावाच्या व्हॉट्सअॅपला पाठविला संदेश
दरम्यान, कविता यांनी आत्महत्या करण्यापूर्वी भाऊ सुशील याला व्हॉट्सअॅपवर संदेश पाठविले. त्यात ‘दिऊ’ला तुमच्याकडे ठेव...प्लीज कुणाचं जवळ नको देऊ...असा संदेश पाठविला असल्याचे पोलीस तपासात समोर आले. रविवारी सायंकाळी पोलिसांनी पंचनामा केला. मुलीबाबत घातपात झाला असेल तर त्याची चौकशी व्हावी, अशी विनंती मुलीच्या कुटुंबीयांनी पोलिसांना केली.