स्टार - ९६५
विजयकुमार सैतवाल
लोकमत न्यूज नेटवर्क
जळगाव : सध्या लग्न समारंभात फोटो अथवा व्हिडिओ शुटींगसाठी ड्रोनचा वापर करण्याकडे अधिक कल वाढत आहे. यासाठी अनेक वेळा ड्रोन उडविताना दिसून येतात. मात्र या साठी योग्य काळजी घेणे महत्त्वाचे असल्याचा सल्ला दिला जात आहे. ड्रोनद्वारे शुटींग करायचीच असेल तर प्रशिक्षित ड्रोन चालकाकडूनच करावी, असे आवाहन केले जात आहे. दरम्यान, जळगावात ड्रोन उडविण्याविषयीचा परवाना आगामी दोन ते तीन महिन्यात दिला जाणार असल्याचे सांगितले जात आहे.
लग्न समारंभ म्हणजे प्रत्येकाच्या जीवनातील महत्त्वाचा क्षण असतो. हा क्षण कॅमेरात टिपणे अनेक वर्षांपासून सुरू आहे. त्यात आता ड्रोनद्वारे शुटींग करण्यास पसंती वाढत आहे. त्यातही प्री वेडींग शुटींगसाठी ड्रोनचा अधिक वापर केला जातो. मात्र ड्रोनचा वापर करताना ते योग्यरित्या उडविता आले पाहिजे, हे महत्त्वाचे आहे. त्यामुळे दक्षता म्हणून ज्याच्याकडे प्रमाणपत्र आहे, त्यांच्याकडून शुटींग केल्यास धोका कमी होतो.
ड्रोन उडविण्यासाठी परवाना हवा!
१) ड्रोन उडवायचे झाल्यास त्यासाठी परवानगी, लायसन्स हवे असते. ज्या भागात ड्रोन उडवायचे आहे, त्या भागातील पोलीस ठाण्यात अर्ज द्यावा लागतो.
२) ड्रोनचे लायसन्स हे दिल्ली येथील डीजीसीए या संस्थेकडून दिले जाते. त्यासाठी अर्ज करून हे लायसन्स मिळते.
३) जळगावात अद्याप नियमावली आली नसून परवानादेखील दोन ते तीन महिन्यांनंतर देणे सुरू होणार आहे.
प्रशिक्षण घेऊनच ड्रोन उडवा
ड्रोन उडविण्यासाठी प्रशिक्षण घेणे आवश्यक आहे. स्वत:कडे किमाण प्रमाणपत्र तरी हवे. प्रशिक्षण घेतलेले असल्यास यात सर्वांचीच सुरक्षितता राहू शकते.
- नीलेश शिंदे, ड्रोन चालक
ड्रोन वापरण्याचेही नियम
-ड्रोन उडवायचे असल्यास त्यासाठी प्रशिक्षण घेणे आवश्यक आहे.
- कोणत्याही भागात ड्रोन उडवायचे असल्यास यासाठी पोलिसांकडून परवानगी घेणे आवश्यक आहे.
- ड्रोन १०० फुटापेक्षा अधिक उंचीवरून ड्रोन उडविता येणार नाही
- ज्या भागात शुटींग करायची आहे, त्या भागातील पोलीस ठाण्यात अर्ज द्यावा लागतो.
- विमानतळ, जिल्हाधिकारी कार्यालयासह सर्वच शासकीय कार्यालय परिसरात ड्रोन उडविता येत नाही.
- विनापरवानगी ड्रोन उडविल्यास कारवाई होऊ शकते. त्यामुळे एकतर परवाना अथवा प्रमाणपत्र आवश्यक आहे.
एका दिवसाचे सात ते आठ हजार रुपये
- ड्रोनद्वारे शुटिंग करण्यास पसंती वाढत असल्याने त्यांचे भावही काहीसे वधारत आहे.
- लग्न समारंभात एका दिवसाच्या शुटिंगसाठी सात हजार रुपये खर्च येतो. यात शहराबाहेर जायचे असल्यास आठ हजार रुपये खर्च येतो.
- लग्न समारंभात ड्रोनद्वारे शुटींग करायची झाल्यास ती प्री वेडिंगच अधिक असते. त्यामुळे या दिवसासाठी अधिक खर्च केला जातो.