जळगाव : जिल्ह्यात तापी नदीवरील खेडी व भोकर या दोन गावांना जोडणाऱ्या पुलाच्या कामांसाठी तब्बल १५२ कोटी रुपयांच्या निधीला मान्यता मिळाली आहे, अशी माहिती पालकमंत्री गुलाबराव पाटील यांनी बुधवारी मंत्रालयात पत्रकार परिषदेत दिली. जळगाव, चोपडा व धरणगाव या तीन तालुक्यांना या पुलाचा लाभ होणार आहे.
चोपडा येथील आमदार लता सोनवणे,अमळनेरचे आमदार अनिल पाटील आणि माजी आमदार चंद्रकांत पाटील उपस्थित होते.
दोन विभाग उचलणार समान भार
पालकमंत्री म्हणाले की, तापी नदीवरील खेडी-भोकरी ते भोकर दरम्यान पूल बांधण्याचे आश्वासन दिले होते. या अनुषंगाने मंत्रालयात तीन उच्चस्तरीय बैठका झाल्या. यात जुलै महिन्यातील बैठकीत या पुलाच्या बांधकामाला जलसंपदा मंत्री जयंत पाटील व सार्वजनिक बांधकाम मंत्री अशोक चव्हाण यांच्यासोबत झालेल्या बैठकीत वरील निधीच्या कामाला तत्त्वत: मान्यता देण्यात आली होती. तसेच यात जलसंपदा व सार्वजनिक बांधकाम या दोन्ही खात्यांनी प्रत्येकी ५० टक्के इतका भार उचलावा असे सूचित केले आहे. यामुळे आता या पुलाचा प्रश्न मार्गी लागणार असल्याचे स्पष्ट झाले आहे.
खेडी-भोकर या दोन गावांना खेडी- भोकर ते चोपडा हे अंतर फक्त १५ किलोमीटरचे आहे. मात्र, तापी नदीवरील पुलाअभावी हे अंतर ७० किलोमीटरचे होते. परिणामी शेतकऱ्यांचा व नागरिकांचा वेळ व पैसा देखील खर्च होतो. शिवाय खेडी भोकर, भादली, कठोरा, किनोद, गोरगावले, गाढोदे, करंज, सावखेडा आदी गावातील शेतकऱ्यांना ये-जा करण्यासाठी सध्या दुसरा कोणताही पर्याय उपलब्ध नाही. आजवर जानेवारी ते जून या कालावधीत तापी नदीवर उभारण्यात येणाऱ्या तात्पुरत्या पुलामुळे थोडी सुविधा होत असली तरी उर्वरित सहा महिने फेरा चुकविता येत नाही.
मनांना जोडणारा पूल
खेडी-भोकरी व भोकर दरम्यान पूल झाल्यास परिसरातील हजारो ग्रामस्थ व वाहनधारकांचा मनस्ताप दूर होणार असून त्यांना पडणारा फेरा वाचणार आहे. याचा चोपडा, जळगाव व धरणगाव या तीन तालुक्यातील जनतेला लाभ होणार असून लोकांना फक्त संपर्काचीच सुविधा होणार नसून मने देखील जुळणार आहेत.
खेडी-भोकरी ते भोकर दरम्यानचा पूल व्हावा म्हणून गुलाबराव पाटील यांच्या नेतृत्वाखाली चोपड्याच्या आमदार लता सोनवणे यांनी मुख्यमंत्री उध्दव ठाकरे, उपमुख्यमंत्री अजित पवार, जलसंपदा मंत्री जयंत पाटील व सार्वजनिक बांधकाम मंत्री अशोक चव्हाण यांच्याकडे मागणी केली होती.
चौकट
असा असेल पूल
तापी नदीवरील खेडी-भोकरी ते भोकर दरम्यानचा पूल - ६०० मीटर लांब.
- प्रत्येकी ३० मीटरचे २२ गाळे.
पुलाच्या दोन्ही बाजूस सुमारे ६५० मीटरचे पोचरस्ते.
भराव टिकवून ठेवण्यासाठी दोन्ही बाजूला बॉक्स रिटर्न व पाईल फाऊंडेशनसह
रिटेनिंग वॉल.
- स्टील रेलिंग रोडसाईड फर्निचर.