जळगाव : शहरातील मुक्ताईनगरात राहणारे दिनेश रामचंद्र तिवारी (४९) यांना फ्लॅट देण्याचे सांगून पाळधी (ता.धरणगाव) येथील दाम्पत्याने सुमारे ४१ लाख १९ हजार रूपयात फसवणूक केल्याची धक्कादायक घटना समोर आली आहे. याप्रकरणी जिल्हापेठ पोलीस ठाण्यात दाम्पत्याविरूध्द गुन्हा दाखल करण्यात आला आहे.
मुक्ताईनगरातील एसएमआयटी महाविद्यालयाजवळील वासुकमल नंदनवन अपार्टमेंट येथे दिनेश रामचंद्र तिवारी राहतात. ते शेती करतात. दरम्यान, वासुकमल नंदनवन इमारतीतील पहिल्या मजल्यावर हरिष रामचंद्र झंवर व पुजा हरिष झंवर (रा. पाळधी, ता. धरणगाव) यांच्या मालकीचा फ्लॅट विक्रीला असल्याची माहिती तिवारी यांना एजंट बिरज जैन यांच्यामार्फत मिळाली. फ्लॅट पाहिल्यानंतर त्यांना तो आवडला. सदरील फ्लॅटवर कुठलाही बोझा नसल्याचे झंवर यांनी सांगितल्यानंतर तिवारी यांनी टोकन म्हणून ११ हजार रूपये त्यांना दिले. दरम्यान, तिवारी यांनी मालमत्ता घेताना कोणाचाही आक्षेप होवू नये म्हणून ३० सप्टेंबर २०१९ रोजी वर्तमानपत्रात नोटीस दिली. ७ ऑक्टोंबर २०१९ रोजी फ्लॅट खरेदी संदर्भात झंवर यांना सांगितले असता सौदापावती न करता तोंडी घराचा ताबा देवून खरेदीनंतर करतो, असे सांगितले. तिवारी यांनी विश्वास ठेवून झंवर यांच्या मागणीनुसार ७ ऑक्टोंबर रोजी ७ लाख ४० हजार, ९ ऑक्टोंबरला ५ लाख, १० ऑक्टोंबरला ५ लाख, ११ ऑक्टोंबरला ५ लाख तसेच १४ आॅक्टोंबरल ४ लाख, ३० नोव्हेंबर २०१९ रोजी चेकने ५ लाख व ४ लाख ४० हजार रूपये तसेच गुगल पे ने अनुक्रमे १८ हजार व २० हजार असे एकूण ४१ लाख १९ हजार रूपये दिले. दरम्यान, मे महिन्यात तिवारी यांचा अपघात झाला. त्यामुळे ते घरी होते.नंतर तिवारी यांनी फ्लॅट खरेदीचा तगादा लावल्यानंतर झंवर यांनी कागदपत्र दिली. त्यात एका बँकेचा बोझा असल्याचे दिसून आले. फ्लॅट खरेदीसाठी बोझा क्लीअर करून द्यावा असे सांगितले असता झंवर याने ८ सप्टेंबर २०२० ला तिवारी यांना नोटीस पाठविली. त्यात ६७ लाख ५१ हजार रूपये एवढी रक्कम ठरलेली असून आपण फक्त ५ लाख ३८ हजार रूपये दिल्याचे त्यात नमूद होते. यावरून आपली फसवणूक झाल्याचे लक्षात येताच तिवारी यांनी जिल्हापेठ पोलीस ठाण्यात फिर्याद दिली. त्यावरून जिल्हापेठ पोलीस ठाण्यात हरिष झंवर व पुजा झंवर या दाम्पत्याविरूध्द गुन्हा दाखल करण्यात आला आहे.