जळगाव : खोलीचा दरवाजा उघडा ठेवणे तरुणांना चांगलेच महागात पडले असून या उघड्या घरातून चोरट्याने दोन महागडे मोबाइल लांबविल्याची घटना शनिवारी सकाळी प्रताप नगरात उघड झाली. याप्रकरणी जिल्हापेठ पोलीस ठाण्यात गुन्हा दाखल करण्यात आला आहे.
प्रताप नगरात हितेश देवीदास भदाणे, श्याम युवराज राठोड व कार्तिक मराठे हे तिघे मित्र एकाच खोलीत भाड्याने राहतात. नेहमीप्रमाणे शनिवारी पहाटे श्याम हा दरवाजा उघडा ठेवून मॉर्निंग वाॅकसाठी निघून गेला. त्यानंतर ६.३० वाजेच्या सुमारास तो खोलीवर परतला. त्यावेळी हितेश याला जाग आली. किती वाजले हे पाहण्यासाठी त्याने मोबाइलचा शोध घेतला. पण, तो मिळून आला नाही. स्वत:च्या मोबाइलवर कॉल करण्यासाठी हितेश मित्र कार्तिक याचा मोबाइल शाेधू लागला. मात्र, त्याचाही मोबाइल मिळून आला नाही. अखेर श्याम राठाेड याच्या मोबाइलवर दोन्ही मोबाइलवर संपर्क साधला असता, दोन्ही मोबाइल बंद आढळून आले. अज्ञात चोरट्याने दरवाजा उघडा असल्याची संधी साधत मोबाइल लांबविल्यामुळे शनिवारी जिल्हापेठ पोलीस ठाणे गाठत त्यांनी तक्रार दिली. त्यानुसार एकूण पंचवीस हजार रुपये किमतीचे दोन मोबाइल चोरून नेल्याप्रकरणी अज्ञात चोरट्याविरुध्द गुन्हा दाखल करण्यात आला आहे.