जळगाव : अहमदाबादहून नवजीवन एक्स्प्रेसने आलेल्या प्रवाशाचा अँटिजेन चाचणी रिपोर्ट पॉझिटिव्ह असल्याचे सांगताच या प्रवाशाने रुग्णालयात दाखल न होता स्टेशनवरून थेट घराकडे पलायन केल्याचा धक्कादायक प्रकार जळगाव रेल्वे स्टेशनवर बुधवारी सकाळी घडला. दरम्यान, अँटिजेन चाचणी केंद्रावर सुरक्षिततेसाठी जीआरपी अथवा रेल्वे पोलिसांचा कुठलाही बंदोबस्त नसल्यामुळेच या तरुणाला पलायन करता आल्याचे सूत्रांनी सांगितले. विशेष म्हणजे हा तरुण पळून जात असताना, जीआरपीचे पोलीस स्टेशनच्या बाहेरच उभे होते. मात्र त्यांनीही कोरोनाच्या भीतीने त्या तरुणाला पकडले नसल्याचे प्रवाशांनी सांगितले.
गेल्या पाच ते सहा दिवसांपासून जळगाव रेल्वे स्टेशनवर मनपाच्या आरोग्य विभागाच्या पथकातर्फे परराज्यातून येणाऱ्या प्रत्येक प्रवाशाची अँटिजेन चाचणी करण्यात येत आहे. रेल्वे स्टेशनच्या प्रवेशद्वाराजवळच हे पथक तैनात करण्यात आले असून, प्रत्येक प्रवाशाची या ठिकाणी नोंद करण्यात येत आहे. शहरातील जोशी पेठेत राहणाऱ्या या तरुणाने मला कुठलाही कोरोना झालेला नाही. मी ठणठणीत आहे, असे सांगून स्टेशनवरून पळण्यास सुरुवात केली. यावेळी आरोग्य विभागाच्या कर्मचाऱ्यांनी तरुणाला अडविण्याचाही प्रयत्न केला. मात्र, तरुणाने काहीएक न ऐकता घराकडे पलायन केले. आता यंत्रणा एकमेकांकडे बोट दाखवित आहेत.