संजय हिरे
भडगाव, जि. जळगाव : तालुक्यातील खेडगाव, पिंप्रीहाट, पिचर्डे व गिरणाकाठालगतच्या काही गावांतील दुभत्या गायी व बैल यांना ‘लम्पी स्किन डिसीज’ या विषाणूजन्य रोगाची लागण झाली आहे. यामुळे पशुपालकांमध्ये मोठी चिंता पसरली आहे. या रोगामुळे पिंप्रीहाट येथे एक गाय दगावल्याचे वृत्त आहे.
अगोदरच मागील दोन वर्षांपासून शेतकरी, पशुपालकांना कोरोनामुळे खरेदी-विक्री, आर्थिक आदी अडचणींना तोंड द्यावे लागत आहे. या नव्या संकटाने पशुपालकांमधे चिंता वाढली आहे.
काय आहे हा रोग
परदेशातून एक वर्षापूर्वी भारतात आलेल्या या विषाणूने आता गिरणा खोऱ्यात शिरकाव केला आहे. लम्पी स्किन डिसीज (एलएसडी) हा विषाणूजन्य रोग जनावरांच्या कातडीला होतो. या विषाणूच्या हल्ल्यामुळे सुरुवातीला जनावरांना ताप येतो. यानंतर शरीराच्या त्वचेवर फोड येतात, ते फोड फुटतात. जखमा होतात. खपल्या निघतात. जनावर चारा खाणे सोडते, अशक्त होते व दगावते.
विषाणूचा प्रसार होऊ नये म्हणून अशी जनावरे इतंरापासून दूर बांधणे, चारापाणी वेगळा ठेवणे, माशा, डास, चिलटे, गोचीड याद्वारे तो पसरत असल्याने गोठ्यात व इतर निरोगी जनावरांवर प्रतिबंधक कीटकनाशक फवारणे, अशी काळजी घेण्याविषयी माहिती काही खासगी पशुवैद्यकांनी ‘लोकमत’ला दिली.