भाजपतर्फे मिसाबंदींचा सत्कार

जळगाव : आणीबाणीच्या काळात सरकारच्या दडपशाहीविरोधात भारतीय लोकशाही अबाधित रहावी म्हणून काम करणाऱ्या शहरातील मिसीबंदींचा सत्कार भाजपतर्फे करण्यात आला. शुक्रवारी आणीबाणीला ४६ वर्षे पूर्ण झाल्यामुळे भाजपकडून वसंत स्मृती कार्यालयात कार्यक्रमाचे आयोजन करण्यात आले होते. या कार्यक्रमात ग्रामीण जिल्हाध्यक्ष तथा आमदार सुरेश भोळे, महानगर जिल्हाध्यक्ष दीपक सूर्यवंशी, जिल्हा परिषद अध्यक्षा रंजना पाटील यांच्या हस्ते उपस्थितीत मिसाबंदी असलेल्या विजय नाईक, सतीश मदाने, श्यामराव कलभांडे, अनिल अभ्यंकर, पद्माकर निळे यांचा सत्कार करण्यात आला. तसेच आणीबाणी काळात मृत्युमुखी पडलेल्या कार्यकर्त्यांना श्रद्धांजली अर्पण करण्यात आली. तसेच या निमित्त ऑनलाइन पद्धतीने राज्यसभेचे सदस्य आदरणीय डॉ. विनय सहस्त्रबुद्धे यांच्या व्याख्यानाचे आयोजन करण्यात आले होते. यावेळी महानगर जिल्हा सरचिटणीस विशाल त्रिपाठी, महेश जोशी, विधानसभा क्षेत्रप्रमुख दीपक साखरे, प्रदीप रोटे यांची प्रमुख उपस्थिती होती.