लोकमत न्यूज नेटवर्क
जळगाव : तालुक्याचे लक्ष लागून असलेल्या आसोदा ग्रामपंचायत निवडणुकीत तीन पॅनलमध्ये सरळ लढत होऊन यात तुषार महाजन यांच्या आसोदा विकास पॅनलने ८ जागांवर बाजी मारली आहे. यात प्रभाग सहामधून जि. प. सदस्या पल्लवी पाटील यांचे पती रवी देशमुख यांचा पराभव झाला आहे. त्यांच्या पॅनलला तीन जागा मिळाल्या आहेत. प्रभागात अरुण कोळी यांचा विजय झाला.
आसोदा येथे १७ जागांसाठी निवडणूक प्रक्रिया पार पडली होती. मोठी ग्रामपंचायत म्हणून सर्व तालुक्याचे या निवडणुकीकडे लक्ष लागून होते. या निवडणुकीत माजी सरपंच विलास चौधरी यांच्या नेतृत्वाखाली लोकमान्य पॅनलने १७, जि. प. सदस्या पल्लवी पाटील यांचे पती रवी देशमुख यांच्या नेतृत्वाखाली संभाजी आबा पाटील ग्रामविकास पॅनलचे १२ तर पंचायत समिती सदस्य तुषार महाजन यांच्या आसोदा विकास पॅनलचे १७ जागांवर उमेदवार निवडणुकीच्या रिंगणात होते. हे तीनही पॅनलप्रमुख निवडणूक रिंगणात होते. यात असोदा विकास पॅनलने ८ जागा जिंकल्या तर लोकमान्य पॅनलला ६ आणि संभाजी आबा पाटील ग्रामविकास पॅनलचे तीन उमेदवार निवडून आले आहेत. यात पॅनलप्रमुख रवी देशमुख यांचा अरुण कोळी यांनी २१९ मतांनी पराभव केला आहे. रवी देशमुख यांना ३९३ मते मिळाली.
आसोदा विजयी उमेदवार असे कंसात मिळालेली मते
प्रभाग १ : हेमंत धनंजय पाटील (५१९), जीवन नथ्थू सोनवणे (५८७), वैशाली भरत पाटील (६६२)
प्रभाग २ : महेंद्र रवींद्र जोहरे (१०८१), संजोग गलू कोळी (१०४८), लताबाई सुभाष महाजन (९०७)
प्रभाग ३ : तुषार रमेश महाजन (१०६२), वर्षा गिरीश भोळे (११२४),
प्रभाग ४ : विलास यशवंत चौधरी (५८५), शकुंतला रमेश महाजन (६९२), योगिता शरद नारखेडे(६२८)
प्रभाग ५ : सुनील बाळू पाटील (५१९), शंकुतला रमेश महाजन (४२९), सुवर्णा विलास चौधरी (४२१)
प्रभाग ६ : अरुण काशिनाथ कोळी (६१२), अनिता दिलीप कोळी(६०९), मंगला विजय भोळे (५५५)
दोन्ही प्रभागात विजय
शंकुतला रमेश महाजन यांनी प्रभागात ४ आणि ५ मध्येही विजय मिळविला आहे. त्यांना अनुक्रमे ६९२ आणि ४२९ मते या प्रभागांमध्ये मिळाली आहे. दरम्यान, आता त्यांना एका प्रभागातून राजीनामा द्यावा लागणार असून यापैकी कोणत्याही एका प्रभागात पोटनिवडणूक होण्याची चिन्हे आहेत.