जळगाव : जिल्ह्यात सोमवारी कोरोनाचे ४२ नवे रुग्ण आढळून आले. त्यापैकी २१ रुग्ण हे एकट्या जळगाव शहरात आढळून आले आहेत. शहरातील रुग्णवाढ थांबत नसल्याचे गंभीर चित्र असून पुन्हा एका बाधित महिलेच्या मृत्यूची नोंद करण्यात आली आहे. दरम्यान, सोमवारी पुन्हा एकदा कमी चाचण्या झाल्याचे समोर आले आहे.
सोमवारी केवळ ८५ ॲन्टीजन चाचण्या करण्यात आल्या असून त्यात २ जण बाधित आढळून आले आहेत. हे दोघेही जळगाव शहरातील आहे. दरम्यान, आरटीपीसीआरचे ३६७ अहवाल प्राप्त झाले असून त्यात ४० बाधित समोर आले आहेत. तर सोमवारी आरटीपीसीआरच्या केवळ १४२ तपासण्या करण्यात आल्या आहेत. लसीकरणाच्या धावपळीत कर्मचारी कमतरतेमुळे चाचण्या घटविण्यात आल्याचे एक चित्र समोर येत आहे. जळगाव शहरातील एका ७९ वर्षीय महिलेच्या मृत्यूची नोंद आहे. मृतांची संख्या १३४५ झाली असून यात शहरातील २९३ मृत्यू आहेत. शहरातील आशाबाबा नगर २, गणपती नगर, मोहाडी रोड, संभाजी नगर, सागर पार्क, एमआयडीसी या भागात प्रत्येकी १ रुग्ण आढळून आले आहेत.
गोलाणी मार्केटमध्ये आजपासून तपासणी
शहरातील गोलाणी मार्केटमध्ये मोबाईल व्यापारी, भाजी विक्रेते, या ठिकाणी काम करणार्यांची चाैथ्या मजल्यावर कोरोना चाचणी होणार आहे. या पार्श्वभूमीवर उपायुक्त संतोष वाहुळे आणि वैद्यकीय अधिकारी डॉ. संजय पाटील यांनी प्रत्येक दुकानात जावून विक्रेत्यांना कोरोना चाचणी करून घेण्याचे आवाहन केले. ही चाचणी सकाळी १० ते २ या वेळेत केली जाणार आहे