जळगाव : जिल्ह्यात कोरोनाची साखळी खंडित करण्यासाठी जिल्हा प्रशासनाने विविध उपाययोजना राबविल्या आहेत. त्यामुळे जिल्ह्यात गेल्या काही दिवसांपासून बाधित रुग्णांची संख्या झपाट्याने कमी होत असून रुग्ण बरे होण्याचे प्रमाणही वाढले आहेत. सद्य:स्थितीत जिल्ह्यातील सक्रिय रुग्णसंख्या ४०० पर्यंत खाली आली आहे. जिल्ह्यातील बारा तालुक्यांमध्ये सक्रीय रुग्णसंख्या तीसच्या आत आली असून जळगाव शहरातील रुग्णसंख्या ४४, भुसावळ ३८, जामनेर ३० तर चाळीसगाव तालुक्यातील रुग्णसंख्या ७९ इतकी आहे. त्यामुळे जिल्ह्यातील रुग्णसंख्या दिवसेंदिवस कमी होणे ही दिलासादायक बाब असून सर्वांनी नियमांचे तंतोतंत पालन करावे, असे आवाहन जिल्हाधिकारी अभिजीत राऊत यांनी केले आहे.
कोरोनाच्या दुस-या लाटेत जळगाव जिल्ह्यात सक्रीय रुग्णसंख्या १२ हजाराच्या जवळपास पोहोचली होती. मात्र कोरोनाची साखळी खंडित करण्यासाठी प्रशासनाने राज्य शासनाच्या मार्गदर्शक सुचनांनुसार प्रभावी उपाययोजना राबवून कोरोनाचा संसर्ग रोखण्यात यश मिळविले आहे. प्रशासनाने राबविलेल्या विविध उपाययोजनांमुळे जिल्ह्यात कोरोनाच्या दुस-या लाटेत १२ हजारपर्यंत गेलेली सक्रीय रुग्णसंख्या झपाट्याने कमी झाली असून ती आता ४०० पर्यंत खाली आली आहे.
केवळ चाळीसगावात सक्रीय रूग्ण अधिक
कोरोनाच्या दुस*या लाटेत जळगाव शहर, भुसावळ, चोपडा या तीन ठिकाणी सक्रीय रुग्णसंख्या हजाराच्यावर गेली होती तर उर्वरित तालुक्यात सक्रीय रुग्णसंख्या पाचशे ते हजाराच्या जवळपास पोहोचली होती. मात्र सध्या जिल्ह्यातील पंधरा तालुक्यांपैकी चौदा तालुक्यात सक्रीय रुग्णसंख्या ही पन्नासच्या आत आली असून एकमेव चाळीसगाव तालुक्यात ही रुग्ण संख्या ७९ इतकी आहे.
तालुकानिहाय उपचार घेत असलेले रुग्ण
जळगाव शहर-४४, जळगाव ग्रामीण-२२, भुसावळ-३८, अमळनेर-१२, चोपडा-२०, पाचोरा-२०, भडगाव-०५, धरणगाव-२५, यावल-२०, एरंडोल-२५, जामनेर-३०, रावेर-२०, पारोळा-२१, चाळीसगाव-७९, मुक्ताईनगर-१०, बोदवड-०५ व इतर जिल्ह्यातील-०४ असे एकूण ४०० रुग्ण उपचार घेत आहेत. यापैकी २६५ रुग्ण लक्षणे असलेले तर १३५ रुग्ण हे लक्षणे नसलेले आहेत. सध्या जिल्ह्यात रूग्ण बरे होण्याचे प्रमाण ९७.९१ टक्क्यांपर्यंत पोहोचले आहे.