आनंद सुरवाडे
लोकमत न्यूज नेटवर्क
जळगाव : कोविडनंतर म्युकरमायकोसिसने डोकेवर काढले होते. या आजाराचे रुग्ण कमी झाले असले तरी मृत्यूची संख्या काहीशी वाढली आहे. शासकीय पोर्टलवरील नोंदीनुसार जिल्ह्यात म्युकरमायकोसिसचे १६ मृत्यू झाले असून, यातील १५ मृत्यू हे शासकीय वैद्यकीय महाविद्यालय व रुग्णालयातील आहेत. मात्र, या ठिकाणी एवढे मृत्यू झाले नसल्याचा दावा रुग्णालय प्रशासनाकडून करण्यात येत आहे. त्यामुळे आकडेवारीतील ही तफावत आहे की मृत्यूबाबत माहिती लपविली जात आहे, असा एक प्रश्न समोर आला आहे.
शासकीय वैद्यकीय महाविद्यालयातील डॉक्टरांकडून मिळालेल्या माहितीनुसार या रुग्णालयात उपचार सुरू झाल्यापासून रुग्णांची संख्या ही ३१वर गेली नाही. शिवाय सद्य:स्थिती केवळ २० रुग्णांवर या ठिकाणी उपचार सुरू असल्याची माहिती जीएमसीतून मिळाली आहे. मात्र, प्रत्यक्षात पोर्टलवरील आकडेवारी व जीएमसीतून सांगितली जात असलेली माहिती यात मोठी तफावत असल्याचे समोर येत आहे. जीएमसीतील सीटू कक्षात नॉनकोविड तर ७ नंबरच्या कक्षात कोविड मात्र म्युकरची लागण झालेल्या रुग्णांवर उपचार करण्यात आले होते.
१२ रुग्ण गेले उपचार सोडून
शासकीय वैद्यकीय महाविद्यालय व रुग्णालयातून १२ रुग्ण हे अर्धवट उपचार घेऊन परतल्याची माहिती शासकीय पोर्टलवर नमूद करण्यात आली आहे. या रुग्णांवर कमीत कमी १४ दिवस उपचार करावे लागतात, असे डॉक्टरांचे म्हणणे आहे. यातील तीन रुग्णांना मेंदूवर शस्त्रक्रिया करायची असल्याने ते मुंबई येथे हलविण्यात आले होते.
कोट
जीएमसीकडून येणाऱ्या रुग्णांच्या अहवालानुसारच ते पोर्टलवर अपलोड केले जात असतात. जर कमी रुग्ण असतील तर त्यांनी तसे कळवावे, तसे बदल करण्यात येतील. कालच्या आकडेवारीनुसार जीएमसीतील ३५ रुग्णावंर उपचार सुरू आहेत, तर आतापर्यंत १५ रुग्णांचा मृत्यू झाला आहे. - डॉ. एन. एस. चव्हाण, जिल्हा शल्य चिकित्सक
आमच्याकडे दोनच मृत्यू - अधिष्ठाता
शासकीय वैद्यकीय महाविद्यालयात शुक्रवारपर्यंत २० रुग्ण उपचार घेत होते. त्यातील एकाला डिस्चार्ज मिळाला असून, आतापर्यंत दोन मृत्यू झाले आहेत. म्युकरचे एकूण ८९ रुग्ण होते. - डॉ. जयप्रकाश रामानंद, अधिष्ठाता जीएमसी
शासकीय नोंद काय सांगते
म्युकरचे एकूण रुग्ण १२५
उपचार सुरू असलेले रुग्ण : ७२
मृत्यू १६
उपचार सोडून गेलेले रुग्ण १८
पोर्टलनुसार जीएमसीचे रुग्ण ७४
उपचार सुरू असलेले रुग्ण ३५
बरे झालेले रुग्ण ९
मृत्यू १५
सोडून गेलेले रुग्ण १२