चंदनझिरा (जि.जालना) : पाणी पिण्याचा बहाणा करून पोलीस ठाण्यातून फरार झालेला खुनाच्या गुन्ह्यातील आरोपीस नऊ तासानंतर जेरबंद करण्यास पोलिसांना शुक्रवारी रात्री उशिरा यश आले आहे. श्याम ऊर्फ रमेश चिकटे (२७, रा. चंदनझिरा) असे आरोपीचे नाव असून, त्याला पोलिसांनी इंदेवाडी येथून ताब्यात घेतले आहे.
जालना शहरातील लक्ष्मण उंबरे यांचा गुरूवारी दुपारी श्याम चिकटे व जितेंद्र आरसूळ यांनी खून केला होता. खून केल्यानंतर दोघेही घटनास्थळावरून फरार झाले होते. शुक्रवारी दुपारी दोघांनाही ताब्यात घेऊन न्यायालयात हजर केले असता, सहा दिवसांची पोलीस काेठडी सुनावण्यात आली होती. त्यानंतर त्यांना चंदनझिरा पोलीस ठाण्यात ठेवण्यात आले होते. यातील श्याम ऊर्फ रमेश चिकटे याने पाणी पिण्याचा बहाणा करून पोलीस ठाण्यातून पळ काढला. या घटनेमुळे खळबळ उडाली होती. पोलीस ठाण्यातून फरार झालेल्या आरोपीला तातडीने ताब्यात घेण्याचे मोठे आव्हान पोलिसांसमोर होते. पोलिसांनी सदरील आरोपीचा माग काढत त्याला इंदेवाडी येथून ताब्यात घेतले. ही कामगिरी पोलीस निरीक्षक यशवंत जाधव, सपोनि. संदीप सावळे, पोलीस उपनिरीक्षक प्रमोद बोंडले, पोलीस कर्मचारी साई पवार, अनिल काळे, नंदलाल ठाकूर, चंद्रकांत माळी आदींनी केली आहे.