ऑनलाइन लोकमत
बर्न, दि. 13 - सेक्स करताना कंडोम हटवणं एका व्यक्तीला चांगलंच महागात पडलं असून त्याच्याविरोधात महिलेने बलात्काराचा गुन्हा दाखल केला आहे. बलात्काराच्या आरोपाखाली त्याला तुरुंगाची हवादेखील खावी लागण्याची शक्यता आहे. स्वित्झर्लंडमधील ही घटना आहे. या घटनेमध्ये एका व्यक्तीने सेक्स करताना आपल्या पार्टनरला न सांगताना कंडोम काढला होता.
स्वित्झर्लंडमझील लौजेन येथील फौजदारी न्यायालयाने हा निर्णय सुनावला आहे. आपल्या पार्टनरला कोणतीही कल्पना न देता कंडोम हटवणं बलात्कार करण्यासारखं असल्याचं न्यायालयाने सांगितलं आहे. न्यायालयाने या 47 वर्षीय व्यक्तीला 12 महिन्यांसाठी निलंबित शिक्षा सुनावली आहे. याचा अर्थ या व्यक्तीला तात्काळ तुरुंगात टाकण्यात येणार नाही, मात्र पुढील 12 महिने त्याला नजरकैदेत ठेवण्यात येणार आहे. यादरम्यान जर त्याने काही गुन्हा केला तर त्याला 12 महिन्यांचा तुरुंगवास होईल.
स्थानिक प्रसारमाध्यमांनी दिलेल्या वृत्तानुसार ही व्यक्ती फ्रान्सची राहणारी आहे. डेटिंग अॅप 'टिंडर'च्या माध्यमातून त्याची या स्विस नागरिक महिलेशी ओळख झाली होती. जून 2015 मध्ये दोघांनी दुस-या भेटीनंतरच शरीरसंबंध ठेवण्यास सुरुवात केली होती. मात्र काही दिवसांनी आपला पार्टनर सेक्स करताना कंडोम वापरत नसल्याचं महिलेच्या लक्षात आलं.
जर त्या महिलेला कंडोम वापरलं जात नसल्याची कल्पना असती तर कदाचित तिने सेक्स करण्यासाठी नकार दिला असता असं न्यायालयाचं म्हणणं आहे. स्वित्झर्लंडमधील ही अशा प्रकारची पहिलीच घटना असल्याचं महिलेच्या वकिलाने सांगितलं आहे.