आखाडा बाळापूर : येथील चहाची टपरी चालविणाऱ्या दोन महिलांना येथील रमा गोपाल अग्रवाल व त्यांच्या परिवाराने साडीचोळी, पुष्पगुच्छ देऊन सन्मानित केले आहे.
आखाडा बाळापूर येथील नांदेड- हिंगोली महामार्गावरील पोलीस ठाण्याच्या समोरच चहाची टपरी आहे. पतीला मदत म्हणून पुढे आलेल्या महिलांनी हा व्यवसाय स्वतंत्रपणे सांभाळला आहे. पोलीस ठाण्याच्या प्रवेशद्वाराजवळ चहाची टपरी चालविणाऱ्या सविता कोरडे व मराठवाडा चौक परिसरातील अश्विनी चव्हाण या दोन महिलांचा अग्रवाल परिवाराच्या वतीने साडीचोळी, पुष्पगुच्छ देऊन सन्मान करण्यात आला.
महिला व्यवसायात पाय रोवून उभ्या राहत आहेत. शिवाय काम करीत असताना लाज न बाळगता पुरुषांच्या बरोबरीने आपण काम करू शकतो हे या महिलांनी दाखवून दिले आहे. गेल्या काही वर्षांपासून सातत्याने त्या चहाची टपरी चालवितात व आपला कुटुंबाचा गाडा हाकतात. त्यांच्या श्रमाचा सन्मान करण्यासाठी अग्रवाल या व्यावसायिकाने पुढाकार घेतला. रमा गोपाल अग्रवाल यांच्या हस्ते आज त्यांच्या चहा टपरीवर जाऊन अश्विनी चव्हाण व सविता कोरडे या दोन उद्योगी महिलांचा साडी-चोळी व पुष्पगुच्छ देऊन सत्कार केला. याप्रसंगी गोपाल अग्रवाल, कृष्णा अग्रवाल, गजानन कदम, संजय भिसे उपस्थित होते. फाेटाे नं ३०