हिंगोली : शहरालगत असलेल्या सुराणा नगरातील राज्य राखीव दलातील जवानाच्या घरी सशस्त्र दरोडा टाकून अडीच लाखांचा ऐवज लांबविल्याची घटना ७ मार्चच्या पहाटे घडली होती. यातील ११ आरोपींच्या मुसक्या आवळण्यात पोलिसांना यश आले आहे. त्यांच्याकडून सोने-चांदीचे दागिने, गुन्ह्यात वापरलेल्या दोन वाहनांसह १० लाख रुपयांचा मुद्देमाल जप्त करण्यात आला.
या घटनेचे स्वरूप लक्षात घेता पोलीस अधीक्षक एम. राकेश कलासागर, अप्पर पोलीस अधीक्षक यशवंत काळे, सहाय्यक पोलीस अधीक्षक यतीश देशमुख, उपवि. पो. अधीक्षक विवेकानंद वाखारे यांच्या मार्गदर्शनाखाली स्थागुशाचे पोनि उदय खंडेराय, सहा.पोनिबी आर. बंदखडके यांनी पोउपनि एस. एस. घेवारे, राहुल तायडे, के.डी. पोटे यांची पथके कामाला लावली. घटनेतील आरोपी जालना जिल्ह्यात असल्याची माहिती मिळताच हे पथक चितळी, पुतळी, विरेगांव तांडा, पिंप्री डुकरे येथे पोहोचले. पोलीस आल्याचा सुगावा लागल्याने दरोडेखोरांनी तेथून पळ काढला. काही आरोपी तर नदी, नाल्यातून पळ काढत होते तसेच उसाच्या फडातही लपून बसले होते. मात्र, चितळी पुतळी, बाबई, कवठा गावकऱ्यांच्या मदतीने पोलीस पथकाने नदीतून दरोडेखोरांचा पाठलाग करत आराेपीला पकडले. त्यांना ताब्यात घेत गुन्ह्यात वापरलेली हत्यारे, सोन्या-चांदीचे दागिने, ३ एलईडी टी.व्ही, दुचाकी व पीकअप वाहन असा १० लाख ४९ हजार रुपयांचा मुद्देमाल हस्तगत केला आहे.
या घटनेतील अन्य एका मुख्य आरोपीचा शोध सुरू असल्याची माहिती पोलिसांनी दिली. दरोडेखोरांकडून अन्य घटना उघडकीस येण्याची शक्यता वर्तविण्यात येत आहे. या पथकात पोलीस कर्मचारी संतोष वाठोरे, भगवान आडे, संभाजी लेकूळे, गजानन पोकळे, अशोक धामणे, राजू ठाकूर, विठ्ठल काळे, शेख मोहम्मद , वाढवे, सायबर सेलचे नीलेश हलगे, जयप्रकाश झाडे, इरफान पठाण, सुमित टाले, राहीत मुदीराज, रमा ठोके आदींचा समावेश होता.