नर्सी नामदेव: हिंगोली तालुक्यातील केसापूर पाटीजवळ ट्रॅक्टर उलटून एकजण ट्रॅक्टर खाली दबून ठार झाल्याची घटना शुक्रवारी सायंकाळी ६ वाजेच्या सुमारास घडली. यामध्ये एकजण जखमी झाला आहे.
पानकनेरगाव येथील शेतकरी कैलाश विश्वनाथ गायकवाड (वय २९) हे हिंगोलीहून पानकनेरगाव येथील आपल्या शेतामध्ये ट्रॅक्टरद्वारे शेणखत घेऊन जात हाेते. हिंगोली ते सेनगाव रोडवरील केसापूर पाटीजवळ ट्रॅक्टरवरील नियंत्रण सुटल्याने ट्रॅक्टरची ट्रॉली अंगावर पलटी झाल्याने कैलास हे ट्रॅक्टरखाली दबल्याने त्यांचा जागीच मृत्यू झाला. तर ट्रॅक्टरमधील एकजण जखमी झाल्याने त्यांना हिंगोली येथील खाजगी दवाखान्यात उपचारासाठी दाखल केले आहे.
या घटनेची माहिती मिळताच नर्सी पोलीस ठाण्याचे ठाणेदार गिरी, कांबळे यांनी जखमींस तत्काळ हिंगोली येथे उपचारासाठी दाखल केले. ट्रॅक्टर कोण चालवत होते, ट्रॅक्टर कोणाचे आहे व ट्रॅक्टरमध्ये एकूण कितीजण बसले होते याविषयी स्पष्ट माहिती मिळाली नाही.