हिंगोली : शाळाबाह्य मुलांचा शोध घेऊन त्यांना शिक्षणाच्या मुख्य प्रवाहात आणण्यासाठी शिक्षण विभागाने कंबर कसली आहे. त्या अनुषंगाने राज्यभर शोध मोहीम राबविण्यात येत असली, तरी हिंगोली जिल्ह्यात मात्र शाळाबाह्य शोध मोहिमेला अद्याप मुहूर्त मिळाला नसल्याचे चित्र आहे. कोरोनामुळे नियोजनासंदर्भातील केंद्रस्तरावरील बैठकही पुढे ढकलावी लागल्याने शाळाबाह्य मुलांचे सर्वेक्षण कधी केले जाणार, याकडे लक्ष लागले आहे.
कामानिमित्त पालकांचे होणारे स्थलांतर, शैक्षणिक सुविधेचा अभाव, पालकांचे अज्ञान यामुळे शाळाबाह्य मुलांच्या संख्येत वाढ होत असल्याचे सांगितले जात आहे. गतवर्षीही शाळाबाह्य मुले आढळली होती. बालकांचा शिक्षणाचा मोफत व सक्तीच्या शिक्षण अधिकार कायद्यान्वये ६ ते १४ वर्ष वयोगटातील शाळाबाह्य मुलांचा शोध घेऊन त्यांना शिक्षणाच्या मुख्य प्रवाहात आणण्यासाठी शिक्षण विभागाने पुढाकार घेतला आहे. अशा मुलांचा वस्त्या, रेल्वे स्थानक, बसस्थानक, गुऱ्हाळ, पाल, वीटभट्टी, कारखाना आदी ठिकाणी शोध घेऊन त्यांना शाळेत प्रवेश देणे आदी कामे शिक्षण विभाग दरवर्षी करत असतो. यावर्षीही शाळाबाह्य मुलांचा शोध घेण्यासाठी दिनांक १ ते १८ मार्चदरम्यान मोहीम राबविण्याचे नियोजन शिक्षण विभागाने केले होते. राज्यभर तशी तयारी केली जात असली, तरी हिंगोली जिल्ह्यात मात्र कोरोनामुळे अद्याप शोध मोहिमेला मुहूर्त मिळालेला नाही. या संदर्भात २५ फेब्रुवारी रोजी जिल्हास्तरावर तर २६ रोजी तालुकास्तरावर बैठक घेण्यात आली तसेच २७ फेब्रुवारी रोजी केंद्रस्तरावर बैठक होणार होती. मात्र, कोरोनाचे वाढते रूग्ण लक्षात घेता, ही बैठक रद्द करावी लागली. त्यामुळे शाळाबाह्य मुलांच्या शोध मोहिमेला कधी मुहूर्त मिळणार, याकडे लक्ष लागले आहे.
कन्टेनमेंट झोनमध्ये होणार नाही सर्वेक्षण
शाळाबाह्य मुलांच्या शोध मोहिमेला सुरुवात झाल्यास जिल्ह्यातील कन्टेनमेंट झोनमध्ये मात्र सर्वेक्षण करण्यात येणार नसल्याचे शिक्षण विभागाने स्पष्ट केले आहे. तसेच मोठे गाव असल्यास अशाठिकाणी गटविकास अधिकाऱ्यांनी सर्वेक्षण करावे, अशा सूचना दिल्या जाणार आहेत.
शाळाबाह्य मुलांचे सर्वेक्षण करण्यासाठी जिल्ह्यातील शिक्षक व अंगणवाडी सेविकांना प्रगणक म्हणून नियुक्त केले जाणार आहे. तसेच कुटुंब, शाळाबाह्य मुले, स्थलांतरित झालेल्यांची नाेंद अ, ब, क, ड प्रमाणे करण्यात येणार असल्याची माहिती देण्यात आली.
तालुकानिहाय शाळा
हिंगोली - १६६
सेनगाव - १६७
वसमत - १८९
कळमनुरी - २००
औंढा - १५७
एकूण - ८७९
शाळाबाह्य मुलांच्या सर्वेक्षणासंदर्भात जिल्हा व तालुका स्तरावर बैठका घेण्यात आल्या आहेत. केंद्र स्तरावर ही बैठक होणार होती. मात्र, कोरोनामुळे ही बैठक पुढे ढकलावी लागली आहे.
- संदीपकुमार सोनटक्के, शिक्षणाधिकारी (प्राथमिक)