हिंगोली : जिल्हा परिषदेचे मुख्य कार्यकारी अधिकारी राधाबिनोद शर्मा यांच्या संकल्पनेतून व मार्गदर्शनातून जिल्ह्यातील सर्व अंगणवाडी केंद्रात एकजिनसीपणा व सारखेपणा असण्यासाठी दर्शनी भाग सारखा रंगविण्यासाठी एक डिझाईन निश्चित करण्यात आली आहे. सर्व अंगणवाडी केंद्रांना सारखी रंगरंगोटी व बोलकी चित्रे काढण्याच्या नावीन्यपूर्ण उपक्रमाची सुरुवात हिंगोली तालुक्यातील खानापूर येथील अंगणवाडी केंद्राच्या रंगरंगोटीने झाली.
हिंगाेली जि. प. चे सीईओ शर्मा यांनी जिल्ह्यात वेगवेगळे उपक्रम राबविण्यास सुरुवात केली आहे. यामध्ये झीरो पेंडसी व डेली डिस्पोजल ''संकल्प अभियान सुंदर कार्यालय अभियान, पेन्शन सेल, स्वच्छ कार्यालय अभियान, वृक्षारोपण अभियान यासारखे उपक्रम राबविण्यात आले. जिल्ह्यातील अंगणवाडी केंद्राच्या भेटीदरम्यान वेगवेगळे रंग व काही ठिकाणी विना रंगरंगोटीच्या इमारती आढळल्याने त्यांनी जिल्ह्यातील सर्व अंगणवाडी केंद्रात एकजिनसीपणा व सारखेपणा असण्यासाठी दर्शनी भाग सारखा रंगविण्यासाठी डिझाईनची निवड करून सर्व अंगणवाडी केंद्राना रंगरंगोटी करण्याच्या सूचना सर्व गटविकास अधिकारी यांना दिल्या आहेत.
यासाठी ग्रामपंचायतस्तरावरील १५ व्या वित्त आयोगातून महिला व बालकल्याण विभागासाठी राखीव असणारा १० टक्के निधीचा उपयोग ग्रामसेवक यांनी करण्याबाबत सूचना दिल्या.
या अभियानाची सुरुवात सीईओ शर्मा यांच्या अध्यक्षतेखाली सर्व गटविकास अधिकारी, बालविकास प्रकल्प अधिकारी यांची बैठक घेऊन उपक्रमाबाबत माहिती दिली. यावेळी अति. मुख्य कार्यकारी अधिकारी शेंगुलवार, धनवंतकुमार माळी, गणेश वाघ यांच्या मार्गदर्शनाखाली बालविकास प्रकल्प अधिकारी, जिल्ह्यातील सर्व पर्यवेक्षिकांची बैठक घेऊन त्यांना मार्गदर्शन करण्यात आले. गटविकास अधिकारी डाॅ. पोहरे, विस्तार अधिकारी भोजे यांनी खानापूर येथील अंगणवाडी केंद्राची इमारत रंगरंगोटी व बोलकी बनविण्यास सुरुवात करुन या अभियानाची सुरुवात केली. येत्या आठवड्यात जिल्ह्यातील अंगणवाडी केंद्रांना रंगरंगोटी करण्याचे काम होणार आहे. या अभियानामुळे बालकांना रंगरंगोटी व बोलक्या अंगणवाडीची इमारती पाहून त्यांचा अंगणवाडीत येण्याचा उत्साह वाढणार आहे. फाेटाे नं. १६