हिंगोली : जिल्ह्यात शिक्षण कायद्यांतर्गत २५ टक्के मोफत प्रवेशाच्या देयकांची प्रतिपूर्ती करण्यासाठी शासनाकडून शाळांना मिळणारे अनुदान यंदा ५० टक्केच मिळाले आहे, तर ५६ पैकी २६ शाळांचेच प्रस्ताव मंजूर झाले असून, इतरांचे प्रस्ताव त्रुटीत निघाले आहेत.
२५ टक्के मोफत प्रवेशाची प्रक्रिया ऑनलाइन केली जाते. २०१९-२० मध्ये यात ५६ शाळांनी ५०७ विद्यार्थ्यांना प्रवेश दिला होता. त्यानंतर या शाळांनी मोफत प्रवेश दिलेल्या विद्यार्थ्यांची माहिती ऑनलाइन सादर करण्यास सांगितले होते. ज्यांनी असे प्रस्ताव सादर केले, त्याच शाळांचे अनुदान प्राप्त झाले आहे, तर ज्यांनी माहितीच सादर केली नाही, त्यांचे अनुदानही आले नाही. ५६ पैकी २६ शाळांचेच परिपूर्ण प्रस्ताव आल्याने त्यांना ५४.३८ लाख रुपये मंजूर झाले. ही रक्कम ५० टक्केच असून, उर्वरित रक्कम कधी मिळणार? हा प्रश्नच आहे.
यामध्ये हिंगोलीतील जेटकिड, स्विस, एबीएम, साखऱ्याची कुमारेश्वर, कुरुंद्याची जगद्ज्योती, सनराईज बोराळा, वसमतच्या लालबहादूर, लिटल किंग, सह्याद्री, राजर्षी, कुर्तडीची सरस्वती, वडगावची ज्ञानराज, डोंगरकड्याची साधना, भाटेगावची सर्वपल्ली राधाकृष्णन, पेठवडगावची प्रहरी, कळमनुरीच्या केंब्रिज व गार्डन हिल्स्, केंब्रिज चुंचा, साई वारंगा फाटा, रेशन्स शिरडशहापूर, स्वामी विवेकानंद आजरसोंडा, डायमंड औंढा, तर जवळा बाजारच्या एमआयपी, युनिक व शिवाजी इंग्लिश स्कूलचा समावेश आहे. इतर शाळांचे प्रस्तावच नाहीत किंवा त्रुटींमुळे ते लटकले आहेत.