तिरोडा : आजचे युग हे स्पर्धेचे युग असून, यामध्ये टिकून राहण्याची कठीण परिश्रम व ध्येय ठरवून त्या दिशेने वाटचाल करण्याची गरज आहे. त्याकरिता युवक-युवतींनी अधिकारी होण्याचे ध्येय निश्चित करावे, असे प्रतिपादन उपविभागीय पोलीस अधिकारी नितीन यादव यांनी केले.
पोलीस विभाग व अदानी फाउंडेशन यांच्या संयुक्त वतीने मागील ३ वर्षांपासून जिल्ह्यातील युवक-युवतींकरिता पोलीस-सैन्य भरतीपूर्व प्रशिक्षण कार्यक्रमाचे आयोजन केले जात आहे. सोमवारी (दि. ६) आयोजित केलेल्या या वर्षीच्या अशाच कार्यक्रमात ते बोलत होते. अदानी पॉवर प्रमुख कांती बिश्वास यांच्या मार्गदर्शनात आयोजित कार्यक्रमात यादव, अदानी पॉवरचे हरिप्रसाद अडथळे, नितीन शिराळकर, सुरक्षा प्रमुख गजेंद्रसिंह शेखावत हे प्रामुख्याने उपस्थित होते. प्रास्ताविकातून शिराळकर यांनी, पोलीस सैन्य भरतीपूर्व प्रशिक्षण कार्यक्रम हा यादव यांचीच संकल्पना असून, त्यांच्याच प्रयत्नांमुळे जिल्ह्यातील युवक-युवतींना याचा लाभ मिळत आहे, असे सांगितले. अडथळे व गजेंद्र सिंग शेखावत यांनीसुद्धा प्रशिक्षणार्थींना मार्गदर्शन केले.
याप्रसंगी पाहुण्यांच्या हस्ते प्रशिक्षणामध्ये सहभागी १०० प्रशिक्षणार्थींना ट्रॅक सूट किट वितरित करण्यात आले. सूत्रसंचालन करून आभार अदानी फाउंडेशनचे प्रकल्प अधिकारी राहुल शेजव यांनी मानले. कार्यक्रमासाठी प्रशिक्षक प्रशांत कावळे व सचिन बिसेन यांनी सहकार्य केले.