गोंदिया : नक्षल समर्थक म्हणून गोंदियातील आणखी तिघांना गोंदिया-बालाघाट पोलिसांची संयुक्त कारवाई करत अटक केली आहे. ही कारवाई सोमवारी (दि.१२) रात्री उशिरा करण्यात आली. अटक करण्यात आलेल्या आरोपींमध्ये छत्रसाल ऊर्फ बंटी मोहन बानेवार (४८, रा. माळी मोहल्ला, चावडी चौक छोटा गोंदिया), लक्ष्मीनारायण ऊर्फ बाळू दिगंबर कुंभारे (५३, रा. साई खापर्डे कॉलनी, कुडवा) व राजेश गोपीचंद पाटील (५१, रा. आंबेडकर चौक, कुडवा) यांचा समावेश आहे.
नक्षलवाद्यांना शस्त्र पुरविणाऱ्या आठ जणांना बालाघाट पोलिसांनी ७ जुलैला अटक केली होती.त्या घटनेचे धागेदोरे गोंदियापर्यंत लागले. त्यावेळी गोंदियातील घनश्याम आचले व विजय कोरेटी या दोघांना ७ जुलैला अटक करण्यात आली होती. याच प्रकरणात गोंदियातील आणखी तिघांना नक्षल समर्थक म्हणून अटक करण्यात आली आहे. बालाघाट जिल्ह्याच्या किरनापूर-किन्ही जंगलात नक्षलवाद्यांना शस्त्र पुरवठा करण्यासाठी फिरत असलेल्या आठ जणांना बालाघाट पोलिसांनी अटक केली होती. त्यांच्याजवळून तीन पिस्तुल, तीन मॅक्झिन, एके ४७, आठ मोबाईल, चारचाकी असलेले दोन वाहने, एलईडी टॉर्च, हवा पंप, एमपीथ्री प्लेयर, पर्स, सुटकेस, कापड भरलेल्या तीन बॅग असा सामान जप्त करण्यात आला होता. नक्षलवाद्यांना पावसाळ्यापूर्वी ५ हजार काडतुसे, पिस्तुल, शस्त्रे दारुगोळा, शिबिर लावण्याचे साहित्य पुरविण्यासाठी एक कोटी रुपयांचा सौदा झाला होता. त्यातील ३० लाख रुपयांचे सामान मागील सहा महिन्यांत नक्षलवाद्यांना पुरविल्याची माहिती आहे. याप्रकरणात नक्षल समर्थक म्हणून काम करणाऱ्या गोंदियातील तिघांना अटक करण्यात आली. ही कारवाई गोंदिया बालाघाट पोलिसांनी संयुक्तरित्या केली आहे. गोंदियाचे पोलीस अधीक्षक विश्व पानसरे, बालाघाटचे पोलीस अधीक्षक अभिषेक तिवारी, नक्षलविरोधी अभियान पथक गोंदियाचे शरद पाटील, बालाघाटचे पीएसआय उके यांनी केली आहे.
...........
बनावट नोटांचे कनेक्शन तपासणार
काही दिवसांपूर्वी बालाघाट पोलिसांनी ५ कोटी रुपयांच्या बनावट जप्त केल्या होत्या. या नोटांचा पुरवठा नक्षल्यांना केला जात असल्याचा संशय व्यक्त केला. याप्रकरणी गोंदिया येथील दोन आरोपींना अटक केली होती. त्यानंतर नक्षलवाद्यांना शस्त्रे पुरविण्याच्या आरोपाखाली गोंदिया येथील तीन जणांना सोमवारी अटक करण्यात आली. त्यामुळे या तिघांचे बनावट नोटांशी काय कनेक्शन आहे का याचा संदर्भ पोलीस तपासत आहे.