पेटविण्यासाठी रॉकेलचा वापर : घटनेच्या दोन दिवसांपूर्वी झाला होता वाद
गोंदिया : कवलेवाडा येथील संजय खोब्रागडे याला त्याच्या पत्नी व तिच्या प्रियकराने जाळल्याची बाब स्पष्ट झाल्यानंतर पोलिसांनी तपासाची चक्रे आणखी गतीने फिरविली आहेत. या प्रकरणातील अनेक बाबी आता पुढे आल्या आहेत. संजय खोब्रागडेला जाळण्यासाठी या आरोपींनी पेट्रोलचा नव्हे तर रॉकेलचा वापर केला होता असे सुद्धा समोर आले. पोलिसांकडे आरोपींनी दिलेल्या माहितीनुसार, संजय खोब्रागडे यांची पत्नी देवकाबाई (४५) व राजू गडपायले (४१) यांचे मागील दोन वर्षापासून प्रेमसंबंध होते. याची माहिती जखमीला मिळाल्याने घटनेच्या दोन दिवसाआधी राजू गडपायले व संजय खोब्रागडे यांच्यात वाद झाला होता. तेव्हापासून राजू गडपायले व देवकाने संजयला संपविण्याचा विचार केला. गावातील सरपंच महिलेच्या घरी लग्न असल्याने गावातील लोक घरी राहणार नाही, त्या दिवशी याचा अखेरचा दिवस ठरवू असे त्या दोघांनी ठरविले. सरपंच महिलेच्या घरी असलेल्या लग्न समारंभात आरोपी राजू गडपायले हा देखील गेला होता. परंतु तो लग्नातून सरळ संजय खोब्रागडेच्या घरी परतला. सरपंच महिलेच्या पुतण्याचे लग्न असल्याने गावातील सर्व जातीधर्माचे लोक या लग्न समारंभात गेले होते. राजू गडपायले लग्नातून संजयच्या घरी आला तेव्हा देवका घराच्या कोपर्यावर उभी होती. पलंग आडवा टाकला होता. आपल्या संबंधाची माहिती संजयला झाली तेव्हापासून संजय आपल्याला त्रास देत असल्याचे देवकाने राजूला सांगितले. त्याचा बंदोबस्त करणे जरूरी आहे असे देवकाने म्हटल्यावर त्या दोघांनी त्यांच्याच घरात असलेले रॉकेल संजयच्या खाटेवर असलेल्या वाकळीवर व इतर कपड्यांवर टाकले. झोपेत असलेल्या संजयला याची भणक लागण्याच्या आतच तिने एका काडीला कापड गुंडाळून आग लावली. तो पेटत असताना ते दोघेही काही क्षण पाहात राहिले. त्यानंतर राजू गडपायले तेथून निघून गेला. भाजत असताना संजय स्वत:ला लागलेली आग विझविण्यासाठी जमिनीवर लोटत असताना देवकाने आपण अडकू नये यासाठी पाणी आणून त्याच्यावर टाकले. त्यानंतर गावकरी गोळा झाले. या प्रकरणाचे नाट्य देवका व तिचा प्रियकर राजू गडपायले याने रचले. संजयचा कायमचा काटा काढण्याच्या नादात हे प्रेमीयुगल अडकले. (तालुका प्रतिनिधी)