सडक-अर्जुनी : सडक-अर्जुनी ते शेंडा रस्त्याचे बांधकाम ठप्प झाले होते. ठप्प झालेले बांधकाम त्वरित सुरू करण्यात यावे अन्यथा या विरोधात तीव्र आंदोलन छेडण्याचा इशारा तालुका राष्ट्रवादी काँग्रेसने दिला होता. यानंतर या रस्त्याचे बांधकाम सुरू करण्यात आले आहे.
सार्वजनिक बांधकाम विभाग क्र. २ गोंदिया यांच्या नियंत्रणात या रस्त्याचे काम सुरू असून कंत्राटदार मे. अताशा आशीर्वाद बिल्डर्स नागपूर यांच्या नावाने आहे. या बांधकामाचा कार्यारंभ आदेश १४ नोव्हेंबर २०१८ ला देण्यात आला. तेव्हापासून या रस्त्याचे बांधकाम कासव गतीने सुरू होते. काही महिने बांधकाम पूर्णपणे ठप्प होते. सडक-अर्जुनीवरून शेंडा गावाकडे जाण्यासाठी मध्येच अनेक गावे लागतात इतर गावांची तालुक्याला येण्याची लगबग असते. ज्या मुख्य रस्त्यावरून ये-जा करावी लागते. तो रस्ता अर्धवट बांधकामामुळे फारच खराब झाला आहे. या रस्त्यावरून जाणे म्हणजे तारेवरची कसरतच करावी लागते. त्यामुळे अर्धवट रस्त्याचे काम कंत्राटदारांनी त्वरित पूर्ण करावे या मागणीचे निवेदन नुकतेच तालुका राष्ट्रवादी काँग्रेस पक्षाच्यावतीने मुख्यमंत्री उद्धव ठाकरे, बांधकाम मंत्री अशोक चव्हाण, पालकमंत्री नवाब मलिक, खा. प्रफुल पटेल, जिल्हाधिकारी गोंदिया यांना डॉ. अविनाश काशीवार, प्रियंक उजवणे, रजनी गिऱ्हेपुंजे, देवचंद तरोणे, शशीकला टेंभुर्णे, दिलीप गभणे, वंदना डोंगरवार, मतीन शेख, मोहन शर्मा, ओमप्रकाश टेंभुर्णे, फारुख शेख यांनी दिले होते. याचीच दखल घेत आता रस्ता बांधकामाला सुरुवात करण्यात आली आहे. त्यामुळे गावकऱ्यांना थोडा दिलासा मिळाला आहे.