गोंदिया : रेमडेसिविर हे कोरोनावरील रामबाण औषध आहे, रेमडेसिविर इंजेक्शनमुळे रुग्ण बरा होतो, गंभीर रुग्णाचा मृत्यू होत नाही किंवा फुप्फसातील संसर्ग कमी करतो हा जनतेमधील गैरसमज आहे. हे औषध कोरोनासाठी प्रभावशाली नसून वैद्यकीय क्षेत्रात इतर औषधी याहीपेक्षा उपयुक्त ठरत आहे. त्यामुळे रुग्णाच्या नातेवाइकांनी रेमडेसिविर मिळत नाही म्हणून भयभीत होऊ नये, असे आवाहन सेवाग्राम (वर्धा) येथील कस्तुरबा रुग्णालयाचे वैद्यकीय अधीक्षक डॉ. एस. पी. कलंत्री यांनी केले आहे.
रेमडेसिविर इंजेक्शनने कोरोना रुग्णाचा मृत्यूदर कमी करणे, रुग्णाला व्हेंटिलेटर लागण्यापासून वाचविणे किंवा आयसीयूमधील रुग्णाचे दिवस कमी करणे, तसेच फुप्फुसातील संसर्ग थांबविणे यापैकी कोणत्याही कारणासाठी उपयुक्त ठरत नसल्याचे त्यांनी संशोधनाअंती म्हटले आहे. जगातल्या २८ देशांमध्ये झालेल्या संशोधनांतून जागतिक आरोग्य संघटनेने सुद्धा रेमडेसिविर उपयुक्त नसल्याचे म्हटले आहे. सोशल मीडियाने या औषधाबद्दल समाजात गैरसमज पसरविला आहे. एखाद्या व्यक्तीला कोरोना झाला आणि रेमडेसिविर मिळत नाही म्हणजे आता मृत्यू अटळ आहे. हा भ्रम लोकांमध्ये तयार होणे भीतीदायक आहे. त्यामुळे रुग्णांचे नातेवाईक डॉक्टरांवर रेमडेसिविर देण्यासाठी दबाव आणतात. रेमडेसिविरशिवाय इतर अनेक औषधींमुळे कोविड रुग्ण बरा होता. सेवाग्राम रुग्णालयात अनेक रुग्णसुद्धा रेमडेसिविरचा उपयोग न करता पूर्णपणे बरे झाले आहेत. रेमडेसिविर इंजेक्शनचा अट्टाहास करण्याची काहीही गरज नाही. रेमडेसिविर इंजेक्शननेविनाही रुग्ण पूर्णपणे बरे होऊ शकतो, असे डॉ. कलंत्री यांनी सांगितले आहे.