प्राथमिक शिक्षकांचे मार्चपासूनचे वेतन अडले

जिल्ह्यातील प्राथमिक शिक्षकांचे मार्च महिन्यापासूनचे वेतन अजूनही मिळाले नाही. त्यामुळे शिक्षक वर्ग आर्थिक कोंडीत सापडला आहे. पाल्यांचे शिक्षण, लग्नसराई व इतर कार्यक्रमांची रेलचेल असताना वेतन

गोंदिया : जिल्ह्यातील प्राथमिक शिक्षकांचे मार्च महिन्यापासूनचे वेतन अजूनही मिळाले नाही. त्यामुळे शिक्षक वर्ग आर्थिक कोंडीत सापडला आहे. पाल्यांचे शिक्षण, लग्नसराई व इतर कार्यक्रमांची रेलचेल असताना वेतन न मिळाल्याने जिल्ह्यातील शिक्षकांत शिक्षण विभागाविरूद्ध असंतोष व चिड निर्माण झाली आहे. मार्च व एप्रिल महिन्याचे वेतन व इतर मागण्यांच्या निराकरणासाठी महाराष्ट्र राज्य प्राथमिक शिक्षक संघ जिल्हा शाखा गोंदियाच्या वतीने विरेंद्र कटरे, एस.यू. वंजारी, डी.टी. कावळे यांच्या नेतृत्वात ९ मे रोजी जि.प. चे उपाध्यक्ष तथा शिक्षक समितीचे सभापती मदत पटले यांच्या प्रमुख उपस्थितीत शिक्षणाधिकारी पाटील व कनिष्ट शिक्षण अधिकारी शिरसाटे यांच्या उपस्थितीत चर्चा करण्यात आली होती. यात वेतनाच्या मुद्यांवर संघटनेच्या वतीने तीव्र पवित्रा घेण्यात आले असता दोन दिवसांत वेतनाची रक्कम पंचायत समितीला पाठवू, असे शिक्षणाधिकारी यांनी सांगितले. मार्चचे वेतन जुन्याच पद्धतीने व एप्रिलचे वेतन शालार्थ योजनेनुसार मिळेल, असेही सांगितले होते. परंतु आज चर्चेला १५ दिवस लोटले तरी शिक्षकांना वेतन मिळाले नाही. यावरुन शिक्षण विभागाचा भोंगळ व सुस्त कारभाराच्या विरोधात उन्हाळा असला तरी घेराव व आंदोलनाचा पवित्रा घेतल्याशिवाय संघटनेकडे पर्याय उरला नाही. दुसरीकडे शासनाची शालार्थ वेतन योजना कितीही चांगली असली तरी ही योजना जिल्ह्यात राबविताना प्रशासनाने शिक्षकांना सांगताना भारी डोकेदुखी बनवून दिली आहे. शिक्षकांना वेतनासाठी पैसे मोजावे लागत आहेत. मुख्याध्यापकांनी मार्च व एप्रिलचे वेतन इंटरनेटवर लोड करुन गटशिक्षणाधिकार्‍यांना पाठविले. प्रत्येक शाळेत संगणक व इंटरनेट सुविधा शासनाने उपलब्ध करून दिली नाही. परंतु वेतन इंटरनेटवर लोड कुठूनही करा-पण करा, अशी सूचना गटशिक्षणाधिकार्‍यांकडून मिळाल्यामुळे मुख्याध्यापकांना संगणक कॅफे व जाणकार व्यक्तीकडे जाऊन वेतनबिल डाऊनलोड करावे लागले. यासाठी शिक्षकांना प्रति शिक्षक ५० रुपये तर कुठे १०० रुपये तर कुठे १५० रुपये खर्च करावे लागले. वेतन एक तारखेला पाहिजेत तर वेतन बिल इंटरनेटवर डाऊनलोड करा, असे सांगितल्यानंतर मार्च व एप्रिलचे वेतन मात्र कोसो दूर आहे. त्यासाठी शाळावार वेतन बिल इंटरनेटवर डाऊनलोड करण्याची सुविधा प्रशासनाने पंचायत समिती स्तरावर करावी. वेतनासाठी लागणारा खर्च बंद करावा. अन्यथा वेतनावर बहिष्कार करुन कामबंद आंदोलन करण्याचा निर्णय महाराष्ट्र राज्य प्राथमिक शिक्षक संघ जिल्हा शाखा गोंदियाच्या वतीने घेतला जाईल. असा इशारा प्रसिद्धीपत्रकातून विरेंद्र कटरे, आनंद पुंजे, एस.यू. वंजारी, डी.टी. कावळे, हेमंत पटले, उमाशंकर पारधी, सुधीर बाजपेयी, नागसेन भालेकर, यशोधरा सोनवाने, नानन बिसेन, रेणुका जोशी आदी महाराष्टÑ राज्य प्राथमिक शिक्षक संघ शाखा गोंदियाच्या पदाधिकार्‍यांनी दिला आहे. (प्रतिनिधी)