सोनपुरी : सालेकसा तालुक्यातील पानगाव-सोनपुरी-खेडेपार रस्त्यावर मोठमोठे खड्डे पडले आहेत. पावसाळ्यात या खड्ड्यांमध्ये पाणी साचत असल्यामुळे अपघातांच्या संख्येत वाढ झाली आहे. रस्त्यावरील खड्ड्यांमुळे या मार्गावरून ये-जा करणाऱ्या नागरिकांना सुद्धा त्रास सहन करावा लागत आहे. मात्र, संबंधित विभागाने अद्यापही या रस्त्याची दुरुस्ती केली नाही. परिणामी गावकऱ्यांची समस्या कायम आहे.
पावसाळ्याच्या दिवसात पानगाव-सोनपुरी-खेडेपार रस्त्यावर चिखलाचे साम्राज्य तयार होते. त्यामुळे या मार्गावरून ये-जा करणाऱ्या शालेय विद्यार्थी व प्रवाशांना सुद्धा याचा त्रास सहन करावा लागतो. खड्ड्यात पाणी साचल्याने केव्हाही अपघाताची शक्यता नाकारता येत नाही. या रस्त्यावर दोन-तीनदा अपघात होऊन काही जणांना अपंगत्व सुद्धा आले आहे. सोनपुरी हे गाव मोठे असून, येथे साप्ताहिक बाजार भरतो. शिवाय येथे पहिली ते बारावीपर्यंत शाळा आणि महाविद्यालय आहे. प्राथमिक आरोग्य केंद्र आणि तलाठी कार्यालयासह अनेक कामानिमित्त नागरिकांची येथे सतत वर्दळ असते. याच मार्गावरून मध्यप्रदेश, छत्तीसगड राज्यांसह खेडेपार, बाह्मणी, पाथरी, सोनपुरी, नवेगाव, पानगाव, पांढरी, पाऊलदौना, रामाटोला, कहाली, निंबा, पिपरिया, बहेला, पठानटोला येथील लोक ये-जा करतात.
हा मार्ग राज्य महामार्गाला जोडणारा असून, नेहमी प्रवाशांची वर्दळ असते. या रस्त्याची दुरुस्ती मागील २०-२५ वर्षांपासून करण्यात आली नाही. स्थानिक लोकप्रतिनिधी आणि संबंधित विभागाच्या वरिष्ठ अधिकारी व आमदारांनी याची दखल घेत रस्त्याची समस्या मार्गी लावण्याची मागणी परिसरातील नागरिकांनी केली आहे.