सडक अर्जुनी : रानडुकराच्या हल्ल्यात एक जण ठार तर अस्वलाच्या हल्ल्यात एक जण गंभीर जखमी झाल्याची घटना रविवारी (दि. २२) सकाळी तालुक्यातील जांभळी दोडके येथे घडली. राधेश्याम भुवनलाल राणे (५५) असे रानडुकराच्या हल्ल्यात ठार झालेल्या तर पतिराम जगतराम उईके (४०) असे अस्वलाच्या हल्ल्यात जखमी झालेल्या इसमाचे नाव आहे.
प्राप्त माहितीनुसार वन विकास महामंडळांतर्गत जांभळी दोडके येथील कंपार्टमेंट क्रमांक ५११ मध्ये पतिराम जगतराम उईके (४०) यांच्यावर अस्वलाने हल्ला करून गंभीर झाला. त्याला केटीएस जिल्हा सामान्य रुग्णालयात दाखल करण्यात आले असून त्यांच्यावर उपचार सुरू आहे. तर दुसरी घटना याच परिसरातील कंपार्टमेंट क्रमांक ५६० मध्ये घडली. रानडुकराच्या हल्ल्यात राधेश्याम भुवनलाल राणे (५५) यांचा मृत्यू झाला. या दोन्ही घटनामुळे वनविकास महामंडळाच्या जांभळी, दोडके परिसरात भीतीचे वातावरण निर्माण झाले आहे. हा परिसर जंगलव्याप्त असल्याने या परिसरात नेहमीच वन्यप्राण्यांचा वावर असतो. तर मागील काही दिवसांपासून वन्यप्राण्यांच्या हल्ल्याच्या घटनांमध्ये वाढ झाली आहे. घटनेची माहिती मिळताच गोंदियाच्या विभागीय व्यवस्थापक दिव्या भारती, सहायक वन व्यवस्थापक अधिकारी अभिजित देशमुख, वन व्यवस्थापक मूलचंद नंदेश्वर, वनक्षेत्र सहायक व्यवस्थापक रमेश लांबट, वनपाल आर.एम. सोनवणे, जांभळीच्या वनरक्षक माया घासले, आनंद शेळके, भूमेश्वर कटरे, सिद्धेश्वर केंद्रे, संगम डांगे यांनी घटनास्थळी भेट देऊन पंचनामा केला. वन्यप्राण्याच्या हल्ल्यात मृत्यू व गंभीर जखमी झालेल्या व्यक्तीच्या कुटुंबीयांना आर्थिक मदत देण्याची मागणी गावकऱ्यांनी केली आहे.