गोंदिया : राज्य शासनाच्या महाडीबीटी पोर्टलवर ‘शेतकरी योजना’ या शीर्षकांतर्गत विविध कृषीविषयक योजनांचा लाभ घेण्यासाठी अर्ज करण्याची सुविधा उपलब्ध करून देण्यात आली आहे. या सुविधेंतर्गत लाभार्थ्यांनी आपल्या नावाची एकदाच नोंदणी करायची आहे. तसेच एकाच अर्जाद्वारे अनेक योजनांचा लाभ त्यांना घेता येणार आहे.
२०२१-२२ करिता अर्ज स्वीकारण्याची प्रक्रिया सुरू करण्यात आली आहे. या प्रक्रियेमध्ये ज्या शेतकऱ्यांनी २०२०-२१ मध्ये महाडीबीटी पोर्टलवर अर्ज केला आहे; परंतु त्यांची कोणत्याही योजनेसाठी निवड झाली नाही, ते शेतकरी त्यांच्या अर्जातील बाबींमध्ये बदल करू शकतील व असे अर्ज २०२१-२२ करिता ग्राह्य धरले जातील. त्याकरिता त्यांच्याकडून पुन्हा शुल्क आकारले जाणार नाही. २०२१-२२ करिता वरील अर्जातील ज्या बाबींकरिता अर्ज केला नाही, त्या बाबींचा अर्जामध्ये विनाशुल्क समावेश करता येईल. महा-डीबीटी पोर्टलवर शेतकरी योजना शेतकऱ्यांच्या सोयीकरिता सर्व योजनांचा लाभ एकाच अर्जाद्वारे देण्याच्या दृष्टीने अर्ज करण्यापासून ते प्रत्यक्ष लाभ मिळेपर्यंत एकात्मिक संगणकीय प्रणाली विकसित केली आहे. या प्रणालीद्वारे शेतकऱ्यांना त्यांच्या पसंतीच्या बाबींच्या निवडीचे स्वातंत्र्य देण्यात आले आहे. शेतकऱ्यांनी शेतीनिगडीत विविध बाबींकरिता अर्ज करायचा आहे. या योजनांसाठी अर्ज करावे, असे आवाहन जिल्हा कृषी विकास अधिकारी महेंद्र मडामे यांनी केले आहे.