चार दिवसांपासून ‘नो विड्रॉल’

गोंदिया डिस्ट्रिक्ट को-आॅपरेटिव्ह बँक शाखा सातगाव येथे १५ नोव्हेंबरपासून पैसे मिळत नसल्याने खातेधारक त्रस्त झाले आहेत.

खातेधारक त्रस्त : गोंदिया डिस्ट्रिक्ट को-आॅपरेटिव्ह बँकेतील प्रकारसाखरीटोला : गोंदिया डिस्ट्रिक्ट को-आॅपरेटिव्ह बँक शाखा सातगाव येथे १५ नोव्हेंबरपासून पैसे मिळत नसल्याने खातेधारक त्रस्त झाले आहेत. स्वत:चेच पैसे बँकेत असून ते मिळत नसल्याने लोकांनी आर्थिक व्यवहार कसा करावा, असा प्रश्न त्यांना पडला आहे. सालेकसा तालुक्यातील साखरीटोला (सातगाव) येथे मध्यवर्ती बँकेची शाखा कार्यरत आहे. सदर शाखेतून कर्मचाऱ्यांचे वेतन दिले जाते. तसेच ग्रामपंचायत, शेतकरी, विविध ठिकाणी काम करणारे मजूर अशा अनेक लोकांचे खाते या बँकेत आहेत. मात्र मागील १५ नोव्हेंबरपासून सदर शाखेतून विड्राल देणे बंद केल्याने बरेच लोक अडचणीत आले आहेत. पैसे मिळत नसल्याने अनेक लोकांचे आर्थिक व्यवहार ठप्प पडले आहेत.मागील ९ नोव्हेंबरपासून शासनाने पाचशे व हजारांच्या नोटांवर बंदी आणली. शासनाच्या या निर्णयाचे जनसामान्यांनी स्वागत केले असले तरी बँकेतून विड्राल करण्यासाठी सर्वसामान्य माणसाला मोठा त्रास सहन करावा लागत आहे. त्यातही मध्यवर्ती बँकेत ‘नो विड्राल’ अशी परिस्थिती आहे. तसेच सदर बँकेने जुन्या पाचशे व हजारांच्या नोटा घेणेसुद्धा बंद केले आहे. त्यामुळे अनेक लोक बँक आॅफ महाराष्ट्र शाखेमध्ये जाऊन नोटा बदलवित आहेत. या प्रकाराने बँक आॅफ महाराष्ट्र शाखेत लोकांची गर्दी वाढली आहे. साखरीटोला येथे बँक आॅफ महाराष्ट्रची एक शाखा असून सदर बँकेत लोकांची रोज गर्दी असते. या बँकेद्वारे लोकांना दोन ते चार हजारांचे विड्राल दिले जाते. मात्र त्यासाठी नागरिकांनी गर्दीचा सामना करण्याची वेळ आली आहे. आदिवासी सहकारी सोसायटी एका मर्यादेच्या वर धान खरेदी करीत नाही. सोसायटीकडेसुद्धा नवीन करन्सी पोहोचलेली नाही. तसेच मध्यवर्ती बँकेत सोसायटीचे खाते असून सदर बँकेमार्फत शेतकऱ्यांना पैसा पुरविला जातो. मात्र सध्या तरी ‘नो विड्राल’ ने परिस्थिती गंभीर आहे. अधिक माहिती घेतली असता मध्यवर्ती बँकेचे २५ कोटी रुपये गोदिया शाखेतच पडून असून शासनाने अद्याप सदर बँकेला नवीन नोटांचा पुरवठा केला नसल्याचे कळले. त्यामुळे सदर परिस्थिती निर्माण झाल्याचे बोलले जाते.शासनाच्या नोटा बंदीच्या निर्णयाचे समर्थन जरी होत असले तरी त्यामुळे सर्वसामान्य माणसांची हेळसांड होत आहे. त्यामुळे जनता त्रस्त झाली असल्याचे दिसून येत आहे.नोटाबंदीचा शेतकऱ्यांना फटकानोटाबंदीचा फटका शेतकरी वर्गाला बसल्याचे चित्र पहायला मिळते. सध्या धान उत्पादक शेतकऱ्यांनी धानाची कापणी व मळणी केली असली तरी त्यांचे धान खरेदी केले जात नाही. धान खरेदी करणारे व्यापारी यांच्याकडेसुद्धा कॅश नसल्याने शेतकऱ्यांचे धान खरेदी करण्यात अडचणी निर्माण झाल्याचे व्यापाऱ्यांचे म्हणणे आहे. ज्यांचे धान खरेदी करण्यात आले अशा शेतकऱ्यांना धानाचे पैसे मिळत नसल्याची ओरड आहे.