राष्ट्रीय लोकअदालत १ ऑगस्ट रोजी

गोंदिया : जिल्हा विधी सेवा प्राधिकरण जिल्हा न्यायालयाच्या वतीने जिल्हा न्यायालय, कामगार न्यायालय तसेच जिल्ह्यातील तालुका विधी सेवा समित्यांमार्फत सर्व तालुका न्यायालयांमध्ये १ ऑगस्ट रोजी राष्ट्रीय लोकअदालतीचे आयोजन करण्यात आले आहे. या लोकअदालतीमध्ये न्यायालयात दाखल करण्यापूर्वीचे प्रकरण व न्यायालयात दाखल असलेली तडजोडपात्र फौजदारी प्रकरणे, एनआय ॲक्ट कलम १३८ची प्रकरणे, बँक रिकव्हरीची प्रकरणे, वैवाहिक-कौटुंबिक वादाची प्रकरणे, कामगारांची प्रकरणे, भू-संपादनाची प्रकरणे, दिवाणी प्रकरणे, भाडे वसुली, बँक वसुली, प्राधिकरणाची कर्ज वसुली प्रकरणे, विद्युत व पाणी बिलाची (चोरीची प्रकरणे सोडून) प्रकरणे, सर्वच प्रकारची तडजोडपात्र दाखल तसेच दाखलपूर्व प्रकरणे ठेवण्यात येणार आहेत. ही प्रकरणे सामंजस्याने सोडविण्यासाठी न्यायाधीश, तज्ज्ञ वकील व सामाजिक कार्यकर्त्यांचे पॅनल मदत करणार आहे. ज्या पक्षकारांना आपली दाखल प्रकरणे या लोकअदालतमध्ये तडजोडीकरिता ठेवायची आहेत त्यांनी संबंधित न्यायालयात २६ जुलैपर्यंत अर्ज सादर करावयाचे आहेत. असे जिल्हा विधी सेवा प्राधिकरणचे अध्यक्ष तथा प्रमुख जिल्हा व सत्र न्यायाधीश आणि जिल्हा विधी सेवा प्राधिकरणचे सचिव यांनी कळविले आहे.