गोंदिया : कोरोनाला मात देण्यासाठी आता देशाने जास्तीतजास्त लसीकरणावर जोर दिला असून त्यानुसार अवघ्या देशात लसीकरणाची एक चळवळ राबविली जात आहे. यांतर्गत, जास्तीत जास्त नागरिकांचे लसीकरण करण्यासाठी नवनवीन प्रयोग हाती घेण्यात आले आहेत. कोरोनाची संभाव्य तिसरी लाट येणार असल्याचे बोलले जात असून त्या लाटेला लसीकरणातून मात देण्यासाठी हे सर्व प्रयत्न सुरू आहेत. त्यानुसार, जिल्हा प्रशासनानेही आपली कंबर कसली असून लसीकरण मोहीम छेडली आहे. जिल्ह्याला १०० टक्के लसीकरण करण्यासाठी शहरापासून ते ग्रामीण भागात लसीकरण केंद्रांची संख्या वाढविण्यात आली आहे. शिवाय विशेष शिबिरांचे आयोजन करून त्यातूनही नागरिकांचे लसीकरण केले जात आहे. परिणामी जिल्हा लसीकरणात तीन लाखांकडे वाटचाल करीत आहे. बुधवारपर्यंतची आकडेवारी बघता जिल्ह्यात २९३१४६ नागरिकांचे लसीकरण करण्यात आले आहे. यामध्ये ४५ ते ६० वर्षे वयोगटातील नागरिकांची संख्या जास्त असून तब्बल १३५२५० नागरिकांनी लस घेतली आहे. जिल्ह्यात लसीकरणात महिलांच्या तुलनेत पुरुषच पुढे असून दोघांमध्ये १४०० एवढे अंतर आहे. विशेष म्हणजे, लसीकरणाला घेऊन नागरिकांच्या मनात एक भीती व संभ्रम निर्माण झाला आहे. त्यामुळे ते कोरोनाची लस घेण्यासाठी पुढे येत नसल्याचे दिसत आहे. त्यात इंजेक्शन म्हणताच महिलांना घाम फुटत असून त्यातूनही महिला लसीकरणासाठी पुढे येत नसल्याचे दिसत आहे. असे असताना मात्र पुरुषांनी ‘मर्द को दर्द नही होता’ हे दाखवून देत महिलांवर मात करीत लसीकरणात बाजी मारली आहे.
----------------------------------
जिल्ह्यात आतापर्यंत झालेले लसीकरण - २९३१४६
पुरुष - १४६५७३
महिला- १४५१७३
---------------------------------
कोट
कोरोना लसीकरणाला घेऊन काही वेगवेगळ्या गोष्टी कानी पडत होत्या. त्यामुळे त्याचे काही परिणाम होतात असे वाटत होते व त्यामुळे आतापर्यंत लस घेतली नाही. मात्र आता गावात लसीकरण सुरू असून सगळेच नागरिक घेत असल्याने आता लस घेणार.
- निरंजना दमाहे
-------------------------
गावात कोरोना लसीला घेऊन नागरिक नानाविध गोष्टी करतात. अशाच काही गोष्टींमुळे लस घेण्याचे टाळले. मात्र कोरोना लसीमुळे आरोग्यावर विपरित परिणाम होत नसून उलट कोरोनापासून बचाव होत असल्याचे आता नागरिक ऐकिवात आहे. त्यामुळे आता लस घेणार.
मीरा नागपुरे.
-------------------------
जिल्ह्यात आतापर्यंत २२.५५ टक्के लसीकरण पूर्ण झाले आहे.