गोंदिया : जुन्या वादाचा वचपा काढण्यासाठी एका हमालाने घराशेजारील इसमाचा दगड व काठ्यांनी मारून खून केल्याची घटना १९ मे च्या पहाटे ४.३० वाजता घडली. सुधीर रमेश सूर्यवंशी (३७), रा. गांधी वॉर्ड, जुना गोंदिया असे मृताचे नाव आहे, तर संतोष बन्साेड (३०), रा. गांधी वॉर्ड, जुना गोंदिया असे आरोपीचे नाव आहे.
त्यांचा जमिनीवरून जुना वाद होता. आरोपी संतोष बन्साेड हा हमालीचे काम करतो. पहाटे उठून दररोज तो कामाला जायचा. नेहमीप्रमाणे तो कामाला जाण्यासाठी निघाला असताना खर्रा घेण्यासाठी मोहल्यातीलच एका पानटपरीजवळ थांबला. यावेळी मृतक सुधीर सूर्यवंशी हा घराकडून मोटारसायकलने आला. त्याच्या मोटारसायलने संतोषला धडक दिली. यात त्यांच्यात वाद झाला. परिणामी संतोषने काठीने मारून सुधीरला ठार केले. या घटनेसंदर्भात गोंदिया शहर पोलिसांनी भादंविच्या कलम ३०२ अन्वये गुन्हा दाखल केला आहे. तपास पोलीस निरीक्षक महेश बनसोडे करीत आहेत.