गोंदिया : गोरेगाव तालुक्यातील ग्राम कवलेवाडा येथे दलित इसमाला जाळल्याप्रकरणी आंबेडकरवादी कृती समितीने २३ मे रोजी गोंदिया बंदचे आवाहन केले आहे. विशेष म्हणजे या घटनेच्या निषेधार्थ समितीच्यावतीने येथील तहसील कार्यालयासमोर धरणे आंदोलन सुरू केले आहे. कवलेवाडा येथील दलित इसम संजय खोब्रागडे यास गावातीलच काहींनी जाळून मारण्याचा प्रयत्न केला. सध्या संजय नागपूर येथे मृत्यूशी झूंज देत आहे. तर याप्रकरणी पोलिसांनी गावातीलच सहा जणांना अटक केली व त्यांना न्यायालयाने २२ मे पर्यंत पोलीस कोठडी सुनावली होती. हा सर्व प्रकार सुरू असतानाच मात्र प्रकरणी पोलिसांनी त्याच्या पत्नी व तिच्या प्रियकराने त्याला जाळून मारण्याचा प्रकार घडल्याचे स्पष्ट केले. तसेच त्या दोघांना अटक केली आहे. मात्र पोलीस या प्रकरणाला चुकीचा अर्थ लाऊन सादर करीत असून गावातील त्या सहा जणांना वाचविण्याचे प्रयत्न करीत असल्याचे आंबेडकरवादी कृती समितीच्या कार्यकर्त्यांचे म्हणणे आहे. यावर समितीच्यावतीने या घटनेच्या निषेधार्थ येथील तहसिल कार्यालयासमोर बुधवारपासून (दि.२१) धरणे आंदोलन सुरू करण्यात आले आहे. गुरूवारीही आंबेडकर वादी कृती समितीच्या कार्यकर्त्यांचे धरणे आंदोलन सुरूच होते. एवढेच नव्हे तर २३ मे रोजी गोंदिया बंदचेही आवाहन करण्यात आले आहे. धरणे आंदोलनात राजकुमार बोंबार्डे, सतीश बंसोड, राजू राहुलकर, मामा बंसोड, विनोद मेश्राम, शुद्धोधन शहारे, रतन वासनिक, वसंत गणवीर, अशोक मेश्राम, यशपाल डोंगर व अन्य कार्यकर्ता सहभागी झाले. (शहर प्रतिनिधी)
कवलेवाडा प्रकरणाच्या निषेधार्थ आज गोंदिया बंद
By admin | Updated: May 23, 2014 00:00 IST