गोंदिया : राष्ट्रीय कीटकजन्य आजार नियंत्रण कार्यक्रम अंतर्गत स्थानीय डीईआयसी केंद्रात हिवताप, डेंग्यू व झिका आजाराबाबत जनजागरण अभियानाचे आयोजन करण्यात आले होते. या कीटकजन्य आजार प्रतिबंध कार्यक्रमाचे उद्घाटन जिल्हा निवासी वैद्यकीय अधिकारी डॉ. सुवर्णा हुबेकर यांच्या हस्ते करण्यात आले. यावेळी प्रमुख मार्गदर्शक म्हणून बालरोग तज्ज्ञ डाॅ. प्रदीप गुज्जर, वैद्यकीय अधिकारी डॉ. त्रिपाठी, मलेरिया पर्ववेक्षक गजभिये, परिचर्या अधिकारी रुपाली टोणे उपस्थित होते.
यावेळी मार्गदर्शन करताना निवासी वैद्यकीय अधिकारी डाॅ. सुवर्णा हुबेकर यांनी गोंदिया जिल्ह्यात गावोगावी वायरल फिव्हर, हिवताप, डेंग्यूच्या साथीचे प्रमाण वाढले आहे. लहान मुलेदेखील तापाने फणफणत आहेत. याला कारण म्हणजे अनियंत्रित डासांची पैदास होय. म्हणून आठवड्यातून एक दिवस घरातील सर्व पाणी साठविण्याचे भांडे स्वच्छ घासून पुसून कोरडे करा व आठवड्यातून एक दिवस कोरडा दिवस पाळा. सांडपाण्याची विल्हेवाट लावा. बाथरूमच्या पाईपला जाळी बसवा, मच्छरदाणीचा वापर करा, आपल्या परिसर स्वच्छ ठेवल्यास मलेरिया आणि डेंग्यूपासून बचाव होऊ शकतो. कुठलाही ताप हा हिवताप असू शकतो. त्यामुळे ताप अंगावर काढू नका. लगेचच आरोग्य केंद्रावर जाऊन मलेरिया, डेंग्यूसाठी रक्त तपासणी करून घ्या, असे आवाहन डॉ. सुवर्णा हुबेकर यांनी केले. यावेळी प्रसिद्ध बालरोग तज्ज्ञ डॉ. प्रदीप गुज्जर यांनी लहान बालकांची मोसमी ज्वरात काय काळजी घ्यावी, आहारविहार कसा असावा, यावर मार्गदर्शन केले. कार्यक्रमाचे संचालन प्रणाली मनोहर यांनी केले तर आभार दीपाली पाणतावणे यांनी मानले.