गोंदिया : शेतकऱ्यांना विविध योजनांच्या लाभासाठी जमिनीच्या सातबारावर आता स्वतःच ई-पीक पाहणी ॲपच्या सहाय्याने माहिती भरणे शासनाने बंधनकारक केले आहे. हे मात्र शेतकऱ्यांना डोकेदुखी ठरत असल्याने शासनाने हे काम कोणत्याही शासकीय कर्मचाऱ्यांकडून करून घ्यावे असा सूर उमटत आहे. पीक कर्ज, पीक विमा आदींचा लाभ घ्यायचा असेल तर स्वतः शेतकऱ्यांनी ई-पीक पाहणी ॲपच्या माध्यमातून पीक पेरा भरावायचा आहे. ग्रामीण भागात आजही अनेक शेतकऱ्यांच्या हाती अँड्रॉईड मोबाईल नाही. मोबाईल असले तरी व्यवस्थित नेटवर्क नाही. ८० टक्के शेतकऱ्यांना हे ॲप कसे डाऊनलोड करायचे, कशी माहिती भरायची याचे ज्ञान नाही. त्यामुळे ई-पीक पाहणीचा शेतकऱ्यांच्या डोक्याला ताप होत सल्याचे चित्र आहे.
.........
कोट
शेतकऱ्यांनी लागवड केलेल्या पिकांची अचूक नोंद करता यावी यासाठी शासनाने ई-पीक ॲपच्या माध्यमातून ही सुविधा उपलब्ध करून दिली आहे. यामुळे शेतकऱ्यांना तलाठ्याकडे जाऊन नोंदणी करावी लागणार नाही. तर तलाठ्यालासुध्दा शेतापर्यंत जाण्याची गरज नाही. दोघांसाठीही हा ॲप महत्त्वपूर्ण आहे.
- गणेश घोरपडे, अधीक्षक कृषी अधिकारी
................
हाताळणी कोण शिकविणार
शेतातील पिकांचे फोटो त्या ॲपमध्ये अपलोड करावयाचे आहेत. शेतकऱ्यांना आधीच एक ना अनेक समस्या आहेत. त्यातही आता शासनाच्या या निर्णयामुळे डोकेदुखी वाढली आहे. शिवाय या ॲपची हाताळणी कशी करायची याची माहिती शेतकऱ्यांना देण्यात आली नाही. त्यामुळे विविध अडचणींना तोंड द्यावे लागत आहे.
- संजय टेंभरे, शेतकरी
......................
ई-पीक पाहणी ॲपमध्ये किती शेतकरी माहिती भरणार हे वेळच सांगणार असले तरी माहिती न भरल्यामुळे अनेक शेतकऱ्यांना शासनाच्या योजनांपासून मुकावे लागणार आहे. शेतकऱ्यांकडे अँड्रॉईड मोबाईलचा अभाव आहे. त्यामुळे माहिती भरायची कशी असा प्रश्न त्यांच्यासमोर आहे.
- रामदास बोरकर, शेतकरी
.................
एकूण शेतकऱ्यांनी केलेली नोंदणी : ३५२७०
ॲक्टिव्ह : १५४३२
इनॲक्टिव्ह : १४५५८
..........................