श्रावणातील उपवासही महागला

कपिल केकत

गोंदिया : श्रावणमास येताच हिंदू धर्मीयांच्या सणासुदीला सुरुवात होते. श्रावणातले सोमवार हे बहुतांश हिंदू धर्मीय करीत असून, येथूनच अन्य सणांमध्ये उपवास ठेवण्याची प्रथा आहे. आता उपवास म्हटला म्हणजे त्यात शेंगदाणे, साबुदाणा व भगर आलीच. या शिवाय उपवासाचे पदार्थ तयार करणे शक्यच नाही. यामुळेच आता श्रावणातच्या उपवासापासून शेंगदाणे, साबुदाणा व भगरची मागणी वाढली आहे. विशेष म्हणजे, या वस्तूंची मागणी वाढल्यामुळे व त्यातच ट्रान्सपोर्टचे दर वाढल्याने या वस्तूंचेही दर आता चढल्याचे दिसत आहे. आजघडीला प्रत्येकच घरात श्रावणातला सोमवार करणाऱ्या व्यक्ती असल्याने त्यांना उपवासाचे पदार्थ लागतच आहेत. मागणी वाढली असली, तरीही या वस्तूंची कमतरता नसून, चढ्या दरात का असेना मात्र, त्यांची खरेदी करावीे लागतच आहे.

----------------------------

१) असे वाढले दर (प्रति किलो)

श्रावणाआधी आता

साबुदाणा ७० ८०

शेंगदाणे १४० १६०

------------------------

२) आवक घटली, मागणी वाढली

साबुदाणा - उपवासाचे बहुतांश पदार्थ साबुदाण्यापासूनच तयार केले जातात. उपवासाची उसळ म्हणा की, उपवासाचे वडे, त्यात साबुदाणा हवाच, यामुळेच साबुदाण्याची मागणी वाढली आहे.

- जिल्ह्यात साबुदाणा नागपूर येथून आणला जातो. आता उपवासांमुळे साबुदाण्याला मागणी असली, तरीही त्याचे शॉर्टेज नाही. त्यामुळे साबुदाणा उपलब्ध आहे.

शेंगदाणा - उपवासातील कोणत्याही पदार्थात शेंगदाणे पडल्याशिवाय त्या पदार्थाला चव येत नाही. परिणामी, शेंगदाणे हमखास टाकले जातात.

- यामुळेच शेंगदाण्याचे दर चढले असून, १६० रुपये किलो दराने शेंगदाणे विक्री केले जात आहे. शेंगदाणेही नागपूर येथूनच येत असून, त्यांचाही नियमित पुरवठा सुरू आहे.

---------------------------

३) भगरच्या दरात थोडी वाढ

उपवासात साबुदाण्यापासून सर्वाधिक पदार्थ तयार केले जातात. मात्र, कित्येक जण साबुदाण्याचे पदार्थ खात नसल्याने त्यांना भगर एक पर्याय आहे. भगरपासूनही उपवासाचे कित्येक पदार्थ तयार केले जातात. येथील व्यापारी नाशिक येथून भगर मागवत असून, सध्या मागणी वाढल्याने ११० रुपये किलो असलेली भगर आता श्रावणात १२० रुपये किलो दराने विकली जात आहे.

-----------------------

मागणी वाढली

श्रावणात बहुतांश हिंदू धर्मीयांचा उपवास राहत असल्याने, साबुदाणा, शेंगदाणे व भगरचे दर चढले आहेत. तिन्ही वस्तूंचे दर १०-२० रुपयांनी वाढले आहेत, शिवाय या वस्तूंचा साठाही परिपूर्ण आहे.

- अंकित खटवानी, व्यापारी